గ్యాస్‌ ఏజెన్సీ పేరిట మోసం

రూ.5.44 లక్షలు పోగొట్టుకొన్న యువకుడు

చిన్నమండెం, న్యూస్‌టుడే: అపరిచిత వ్యక్తుల చేతిలో మోసపోయి నగదు పోగొట్టుకున్న ఘటన చిన్నమండెం మండలంలో చోటుచేసుకుంంది. ఎస్‌.ఐ. రమేష్‌బాబు సోమవారం కేసు వివరాలు వెల్లడించారు. చిన్నమండెంకు చెందిన ఓ యువకుడు ఇంటర్మీడియట్‌ వరకు చదువుకుని ఇంటి వద్ద ఖాళీగా ఉంటున్నాడన్నారు. తనకున్న అయిదెకరాల స్థలంలో గ్యాస్‌ ఏజెన్సీ పెట్టాలని నిర్ణయించుకుని ఆన్‌లైన్‌లో వెతికి అందులో ఓ గ్యాస్‌ ఏజెన్సీ పేరుతో ఒక లింకు కనిపించడంతో దానిపై క్లిక్‌ చేసి ఫోన్‌ నంబరు పంపాడన్నారు. కంపెనీ ప్రతినిధులమంటూ కొందరు ఫోన్‌ చేసి ఏజెన్సీ ఇస్తామని, తాము చెప్పినట్లు చేయడంతో పాటు నగదు పంపితే ఏజెన్సీ కేటాయిస్తామని నమ్మబలికారన్నారు. వారు చెప్పిన విధంగానే గతేడాది డిసెంబరు నుంచి ఇప్పటివరకు మొత్తం రూ.5.44 లక్షలు పంపినట్లు బాధితుడు పంపినట్లు వివరించారు. అనంతరం కంపెనీ పేరుతో చేసిన ఫోన్‌ నంబరు స్విచ్‌ ఆఫ్‌ కావడంతో మోసపోయినట్లు గ్రహించి సోమవారం తమకు ఫిర్యాదు చేశాడన్నారు. యువకుడి ఫిర్యాదు మేరకు కేసు నమోదు చేసి దర్యాప్తు చేస్తున్నామని ఎస్‌.ఐ. తెలిపారు.