వాయుబండపై బాదుడు

ఒక్కో సిలిండర్‌ డెలివరీకి అదనంగా రూ.50 వసూలు
జిల్లాలో వినియోగదారుపై నెలకు రూ.1.80 కోట్ల భారం

గృహ వినియోగ గ్యాస్‌ సిలిండర్లు

జమ్మలమడుగు, పులివెందుల, న్యూస్‌టుడే: గ్యాస్‌ సిలిండర్‌ ఇంటికి తెచ్చినప్పుడు రసీదుపై ఉన్న మొత్తాన్ని మాత్రమే చెల్లించాలని.. అదనంగా ఏమీ ఇవ్వాల్సిన అవసరం లేదని పౌరసరఫరాల శాఖ కమిషనర్‌ హెచ్‌.అరుణ్‌కుమార్‌ ఇటీవల ఓ ప్రకటనలో పేర్కొన్నారు. నిబంధనలకు విరుద్ధంగా ఎవరైనా వసూలు చేసినట్లయితే జిల్లా పౌరసరఫరాల శాఖ అధికారులు, ఇంధన సంస్థల మార్కెటింగ్‌ సిబ్బందికి ఫిర్యాదు చేయాలని ఆయన సూచించారు. క్షేత్ర స్థాయిలో వాటిని అమ లు చేయాల్సిన జిల్లా పౌరసరఫరాల శాఖ, ఎన్‌ఫోర్స్‌మెంట్‌ డీటీలపైనే ఉంటోంది. ప్రస్తుతం గ్యాస్‌ సిలిండర్‌ ధర రూ.1,111 ఉంది. ఇంటికి చేరాలంటే డెలివరీ చేసే బాయ్‌ రూ.30 నుంచి రూ.40 వరకు చేయి తడపాల్సి ఉంటుంది. లేకుంటే తర్వాత బుక్‌ చేసుకునే వాయుబండ తూకం తగ్గడమో, జాప్యం చేయడమో జరుగుతుందని వినియోగదారులు ఆందోళన చెందుతున్నారు. పైఅంతస్తుల్లో ఉన్నవారికి మరింత మొత్తం వసూలు చేస్తున్నట్లు ఆరోపణలు ఉన్నాయి.

* జిల్లాలో గృహ వినియోగదారులకు సంబంధించిన కనెక్షన్లు 5,99,802 ఉన్నాయి. కనీసం నెలకు ఒకసారి వాయుబండను సగటున బుక్‌ చేస్తున్నారు. అదనంగా వసూలు చేస్తున్న రూ.30తో లెక్కిస్తే సుమారు నెలకు రూ.1.80 కోట్లు అవుతోంది. ఏడాదికి అదనపు సొమ్ము విలువ రూ.21.60 కోట్లు అవుతోంది. పెద్ద పట్టణాల్లో రూ.40 వరకు వసూలు చేస్తున్నట్లు ఆరోపణలు ఉన్నాయి.

5 కి.మీ.లోపు అయితే అవసరం లేదు

5 కి.మీ. లోపు బిల్లుపై పేర్కొన్న మొత్తం కంటే అదనంగా ఒక్క రూపాయి కూడా చెల్లించాల్సిన అవసరం లేదు. ఆ పరిధి దాటితే నిబంధనల ప్రకారం ఇస్తే చాలు. డెలివరీ బాయ్‌లు డిమాండ్‌ చేస్తే స్థానిక ఎన్‌ఫోర్స్‌మెంట్‌ డీటీలకు ఫిర్యాదు చేస్తే చర్యలు తీసుకుంటాం.

సుబ్బారెడ్డి, జిల్లా పౌరసరఫరాలశాఖ అధికారి, కడప