పంట దిగుబడుల కొనుగోలుకు సిద్ధం కండి

మాట్లాడుతున్న డీఏవో నాగేశ్వరరావు, పక్కన అధికారులు

కడప వ్యవసాయం, న్యూస్‌టుడే : పంట దిగుబడులు కొనుగోళ్లకు ఏర్పాట్లు చేసుకోవాలని వ్యవసాయశాఖ జిల్లా అధికారి నాగేశ్వరరావు, పౌరసఫరాల సంస్థ జిల్లా అధికారి అర్జునరావు పేర్కొన్నారు. శనివారం వ్యవసాయశాఖ జిల్లా సమావేశ మందిరంలో పంట దిగుబడులు కొనుగోళ్లపై ఏర్పాటు చేసిన ఒక రోజు శిక్షణ కార్యక్రమంలో వారు మాట్లాడారు. రైతులు కొనుగోలు కేంద్రాలకు దిగుబడులను తీసుకొస్తే ప్రభుత్వం ప్రకటించిన మద్దతు ధర ప్రకారం కొనుగోలు చేయాలని అధికారులకు ఆదేశించారు. జిల్లా పౌరసరఫరాల సంస్థ పరిధిలో ఈ సారి కొత్తగా రాగి, జొన్నలు కొనుగోలు చేసేందుకు ప్రభుత్వం ఆదేశాలు ఇచ్చిందన్నారు. డీసీఎంఎస్‌ ఆధ్వర్యంలో 9, సహకార సంఘాల ఆధ్వర్యంలో 9 కొనుగోలు కేంద్రాలు ఏర్పాటు చేస్తున్నాయని పౌరసరఫరాల సంస్థ జిల్లా అధికారి అర్జునరావు పేర్కొన్నారు. రాగులు క్వింటా రూ.3,578, జొన్నలు హైబ్రీడ్‌ రకం రూ.2,970, మాల్‌దండి రకం రూ.2,990తో కొనుగోలు చేస్తారన్నారు. రైతులు ఈ నెల 6వ తేదీ నుంచి రైతుభరోసా కేంద్రాల్లో పేర్లు నమోదు చేసుకోవాలని సూచించారు.  మార్క్‌ఫెడ్‌ పరిధిలో శనగ, మినుములు కొనుగోలు చేస్తున్నట్లు ఆ సంస్థ అధికారి నరసింహారెడ్డి తెలిపారు. శనగ క్వింటాకు రూ.5,335, మినుములు రూ.6,600  మద్దతు ధర ఉందన్నారు. సమావేశంలో డీసీఓ సుభాషిణి, తదితరులు పాల్గొన్నారు.