వచ్చే ఎన్నికల్లో తెదేపా గెలుపు తథ్యం

యువగళం పాదయాత్రలో నారా లోకేశ్‌ వెంట తెదేపా జాతీయ ప్రధాన కార్యదర్శి నల్లారి కిశోర్‌కుమార్‌రెడ్డి

కలికిరి, న్యూస్‌టుడే: యువతలో ఆత్మస్థైర్యం నింపేందుకు నారా లోకేశ్‌ చేపట్టిన యువగళం పాదయాత్రతో తెలుగుదేశం పార్టీ అధికారంలోకి రావడం తథ్యమని తెదేపా జాతీయ ప్రధాన కార్యదర్శి నల్లారి కిశోర్‌కుమార్‌రెడ్డి, మదనపల్లె నియోజకవర్గ తెదేపా బాధ్యుడు దొమ్మలపాటి రమేష్‌ పేర్కొన్నారు. శనివారం పూతలపట్టు నియోజకవర్గంలో జరిగిన యువగళం పాదయాత్రలో తెదేపా జాతీయ ప్రధాన కార్యదర్శి నారా లోకేశ్‌ను వేర్వేరుగా కలసి మాట్లాడారు. పార్టీ కార్యకర్తలు, ప్రజల అండదండలు ఉన్నంత వరకు నారా లోకేశ్‌ పాదయాత్రను ఎవరూ అడ్డుకోలేరని, ఒక వేళ అడ్డుకోవాలని ప్రయత్నిస్తే ప్రజలే తగిన గుణపాఠం చెబుతారని హితవు పలికారు. కార్యక్రమంలో ఆయా నియోజకవర్గాల తెదేపా నాయకులు, కార్యకర్తలు పాల్గొన్నారు.

పాదయాత్రలో మాజీ ఎమ్మెల్యే దొమ్మలపాటి రమేశ్‌

రాయచోటి: తెదేపా జాతీయ ప్రధాన కార్యదర్శి నారా లోకేశ్‌ చేపట్టిన యువగళం పాదయాత్రలో ఆయన ప్రచార రథాన్ని పోలీసులు అడ్డుకోవడం పిరికిపంద చర్య అని మాజీ ఎమ్మెల్యే, తెదేపా రాయచోటి నియోజకవర్గ ఇన్‌ఛార్జి ఆర్‌.రమేష్‌కుమార్‌రెడ్డి వివర్శించారు. పూతలపట్టు మండలం అరకొండ దగ్గర నుంచి శనివారం లోకేశ్‌ను కలిసి పాదయాత్రలో ఆయనతోపాటు నడిచినట్లు తెలిపారు. స్థానిక తెదేపా కార్యాలయంలో శనివారం ఆయన మాట్లాడారు. లోకేశ్‌ పాదయాత్రతో వైకాపా నేతల గుండెళ్లో రైళ్లు పరుగెడుతున్నాయని, పాదయాత్రకు ప్రజల నుంచి ఆదరణ లభిస్తోందన్నారు. ఎప్పుడు ఎన్నికలు జరిగినా తెదేపా విజయం తథ్యమన్నారు.