బోర్డులు పీకెయ్‌... భవనాలు కట్టెయ్‌!

బోర్డును తొలగించి చేపడుతున్న నిర్మాణాలు

పీలేరు గ్రామీణ, న్యూస్‌టుడే : పీలేరు, పరిసర పంచాయతీల పరిధిలో ప్రభుత్వ, డీకేటీ భూములను కొందరు ఆక్రమించుకోగా అప్పటి మదనపల్లె సబ్‌ కలెక్టర్‌ జాహ్నవి ఆధ్వర్యంలో విచారణ చేపట్టి స్వాధీనం చేసుకున్నారు. ప్రభుత్వ భూముల్లో హెచ్చరిక బోర్డులు ఏర్పాటు చేయించారు. ప్రస్తుతం ఆ భూములు రూ.కోట్లు పలుకుతున్నాయి. కబ్జాదారులు ఆక్రమిత భూముల్లో ఎలాగైనా పాగా వేయాలని చూస్తున్నారు. పీలేరు పంచాయతీ సర్వే నంబరు 30లో చెరువు పొరంబోకు స్థలం 20 ఎకరాలు ఉంది. చెరువు కట్ట కింద ఎకరం భూమిపై ఓ బడా బాబు కన్నేశాడు. భారీగా మట్టిని నింపి చదును చేసి రెండు బోరు బావులు తవ్వించాడు. ఆక్రమణల స్వాధీన ప్రక్రియలో ఈ భూమిని స్వాధీనం చేసుకున్న రెవెన్యూ అధికారులు హెచ్చరిక బోర్డు ఏర్పాటు చేశారు. అక్రమార్కులు ఇక్కడ ఏర్పాటు చేసిన హెచ్చరిక బోర్డును తొలగించేశారు. అయినా రెవెన్యూ అధికారుల్లో కదలికలేదు. ఇదే అవకాశంగా తీసుకున్న కబ్జాదారులు నిర్మాణాలు చేపట్టారు. బళ్లారి- నాయుడుపేట జాతీయ రహదారి పక్కనే ఈ స్థలం ఉండడంతో ఎకరం రూ.8 కోట్ల ధర పలుకుతోంది. కబ్జాదారులపై ఎలాంటి చర్యలు లేకపోవడంతో ఆక్రమణల పరంపర కొనసాగుతూనే ఉంది. ఈ విషయమై తహసీల్దారు రవిని వివరణ కోరగా పరిశీలించి ఆక్రమణదారులపై చర్యలు తీసుకుంటామన్నారు.