తాగునీటి ఎద్దడి నివారణకు ముందస్తు చర్యలు: కలెక్టర్‌

అధికారులతో సమీక్షిస్తున్న కలెక్టర్‌ గిరీష

రాయచోటి, న్యూస్‌టుడే: వేసవిలో తాగునీటి ఎద్దడి నివారణకు ముందస్తు చర్యలు చేపట్టాలని, ఇందుకు అవసరమైన ప్రణాళికలు సిద్ధం చేయాలని కలెక్టర్‌ గిరీష అధికారులను ఆదేశించారు. కలెక్టరేట్‌లో సోమవారం ఆయన అధికారులతో సమావేశం నిర్వహించారు. ఎండలు, వడగాల్పుల బారిన పడకుండా ప్రజలను అప్రమత్తం చేయాలని సూచించారు. ఉపాధిహామీ పథకం కూలీలకు ఓఆర్‌ఎస్‌ పొట్లాలు పంపిణీ చేయాలని, ఆర్టీసీˆ బస్టాండ్లలో తాగునీటి వసతి కల్పించాలని ఆదేశించారు. ప్రధాన కూడళ్లు, రద్దీ ప్రాంతాలలో చలివేంద్రాలు ఏర్పాటు చేయాలన్నారు. మండలాల్లో తాగునీటి సమస్యపై రెవెన్యూశాఖ అధికారులు క్షేత్రస్థాయి పరిశీలన చేయాలన్నారు. సమావేశంలో డీఆర్వో సత్యనారాయణ, రాజంపేట సబ్‌కలెక్టర్‌ అహ్మద్‌ఖాన్‌, ఆర్డీవోలు రంగస్వామి, డీపీవో ధనలక్ష్మీ, డీఎల్‌డీవోలు, ఎంపీడీవోలు, తహసీల్దార్లు తదితరులు పాల్గొన్నారు.