ప్రభుత్వ స్థలం అన్యాక్రాంతం కాకుండా చూడండి: తెదేపా

మహిళలతో కలిసి నిరసన వ్యక్తం చేస్తున్న తెదేపా నాయకులు

మైదుకూరు, న్యూస్‌టుడే : బద్వేలు రోడ్డు చిన్న మసీదు వద్ద ఎర్రచెరువు అలుగువంక పక్కన ప్రభుత్వ స్థలం అన్యాక్రాంతం కాకుండా చర్యలు తీసుకోవాలని తెదేపా నాయకులు డిమాండు చేశారు. వంక ఇనుప కంచెను ధ్వంసం చేసి కల్వర్టు నిర్మాణానికి ప్రయత్నించిన వైకాపా నాయకులపై చర్యలు తీసుకోవాలని కోరారు. వైకాపా నాయకులు కొందరు ప్రభుత్వ స్థలాన్ని కబ్జా చేసేందుకు వీలుగా నీటి యాజమాన్య సంస్థ అధికారుల అనుమతితో వంకపై కల్వర్టు నిర్మాణాన్ని స్థానిక మహిళలు అడ్డుకోగా వారిని ఏమార్చి తాత్కాలిక కల్వర్టు నిర్మాణం చేసిన విషయం తెలిసిందే. మహిళల మాటలను బేఖాతరు చేసి కల్వర్టు నిర్మాణం చేశారనే విషయం తెలుసుకున్న తెదేపా నాయకులు మంగళవారం చిన్నమసీదు వద్దకు చేరుకుని పరిశీలించారు. పార్టీ నాయకుడు రఫి ఆధ్వర్యంలో నాయకులు పరిశీలించారు. స్థానిక మహిళలతో మాట్లాడారు. వంకపై దారి ఏర్పాటును వ్యతిరేకించిన మహిళలను దుర్భాషలాడిన వైకాపా నాయకులపై పోలీసులు చర్యలు తీసుకోవాలన్నారు. వంకపై ఏర్పాటు చేసిన తాత్కాలిక కల్వర్టును తొలగించి కంచెను పునరుద్ధరించాలన్నారు. అనంతరం తహసీల్దారు బి.అనూరాధకు వినతిపత్రం అందజేశారు.