భరత్‌కుమార్‌ యాదవ్‌కు 14 రోజుల రిమాండు

పులివెందుల, న్యూస్‌టుడే : పులివెందుల పట్టణంలో ఈ నెల 28న భరత్‌కుమార్‌ యాదవ్‌ తుపాకీతో జరిపిన కాల్పుల్లో దిలీఫ్‌ మృతి చెందగా, మహబూబ్‌బాషా తీవ్రంగా గాయపడిన విషయం తెలిసిందే. దిలీఫ్‌ భార్య భాను ఇచ్చిన ఫిర్యాదు మేరకు కేసు నమోదు చేసి, నిందితుడు భరత్‌కుమార్‌ యాదవ్‌ను అరెస్టు చేసి స్థానిక కోర్టులో గురువారం హాజరుపరిచినట్లు పోలీసులు వెల్లడించారు. నిందితుడు భరత్‌కుమార్‌ యాదవ్‌కు ఏప్రిల్‌ 13వ తేదీ వరకు రిమాండ్‌ విధిస్తూ న్యాయమూర్తి ఆదేశాలు జారీ చేసినట్లు పోలీసులు తెలిపారు. ఈ మేరకు నిందితుడిని కడప కేంద్ర కారాగారానికి తరలించినట్లు చెప్పారు.