రామగోపాల్‌రెడ్డి అనే నేను...!

ప్రమాణ స్వీకారం అనంతరం శాసనమండలి అధ్యక్షుడు మోషేన్‌ రాజుకు పుష్పగుచ్ఛం అందజేస్తున్న ఎమ్మెల్సీ భూమిరెడ్డి రామగోపాల్‌రెడ్డి

ఈనాడు డిజిటల్‌, కడప : శాసనమండలి సభ్యుడిగా రాయలసీమ ప్రాంత అభివృద్ధికి అన్ని విధాల సహకరిస్తానని భూమిరెడ్డి రామగోపాల్‌రెడ్డి అన్నారు. పులివెందుల వాసిగా తనేమిటో నిరూపించుకుని.. తెదేపా బలోపేతానికి, ప్రజానీకానికి సేవలు అందిస్తానన్నారు. శాసనమండలి అధ్యక్షుడు మోషేన్‌రాజు ఛాంబర్‌లో ఎమ్మెల్సీగా శుక్రవారం ప్రమాణ స్వీకారం చేసిన అనంతరం రామగోపాల్‌రెడ్డి విలేకరులతో మాట్లాడారు. ‘2024లో తెదేపా జైత్రయాత్ర ఎమ్మెల్సీ ఎన్నికలతోనే ప్రారంభమైంది. రాయలసీమ ప్రజలు విజ్ఞతతో ఆలోచించి అధికార పార్టీని ఓడించారు. అన్ని విధాలుగా రెచ్చగొట్టాలని చూసినా ప్రజలు నమ్మకుండా పట్టం కట్టారు’ అని సంతోషం వ్యక్తం చేశారు. రాయలసీమ ప్రాంతానికి సీఎం జగన్‌ చేస్తున్న అన్యాయాలను ఎప్పటికప్పుడు ప్రజాక్షేత్రంలో ఎండగడతామన్నారు. తెదేపా అధికారంలోకి రాగానే రైతుల సమస్యలన్నీ పరిష్కరిస్తామని పేర్కొన్నారు. కుటుంబ సభ్యులతో కలిసి ప్రమాణ స్వీకార కార్యక్రమంలో పాల్గొన్నారు. అనంతరం తెదేపా అధినేత చంద్రబాబును మర్యాద పూర్వకంగా కలిశారు.