చార్‌ధామ్‌ యాత్రలో పులివెందుల వాసుల ఇక్కట్లు.. మోసగించిన ట్రావెల్స్ నిర్వాహకులు

పాట ప్రాంతంలో పులివెందుల వాసులు

పులివెందుల, న్యూస్‌టుడే: హైదరాబాద్‌కు చెందిన ఓ ట్రావెల్స్‌ నిర్వాహకులు ఒప్పందం మేరకు వసతులు కల్పించకుండా తమను మోసగించారని చార్‌ధామ్‌ యాత్రకు వెళ్లిన పులివెందులకు చెందిన యాత్రికులు ఆరోపించారు. తాము ఉత్తరాఖండ్‌లోని పాట ప్రాంతంలో ఆగిపోయామంటూ సుమారు 15 మంది యాత్రికులు చరవాణిలో స్థానిక విలేకర్లతో మాట్లాడారు. తాము హైదరాబాద్‌ నుంచి ఓ ట్రావెల్స్‌ బస్సులో చార్‌ధామ్‌ యాత్రకు వెళ్లామని తెలిపారు. ఇందుకోసం ఒక్కొక్కరి నుంచి రూ.40 వేల చొప్పున వసూలు చేశారని వివరించారు. పాట ప్రాంతం నుంచి తమను హెలీకాప్టర్‌లో తీసుకెళ్లాల్సి ఉండగా, అది తప్పిపోయిందని మభ్యపెడుతూ బస్సులో నుంచి దించేశారని వాపోయారు. తమకు భోజనం, బస వసతులు కల్పించలేదని, తీవ్ర ఇబ్బందులకు గురవుతున్నామని ఆవేదన వ్యక్తం చేశారు. ఇక్కడ ఎవరూ పట్టించుకోవడం లేదని, ఏపీ ప్రభుత్వం దృష్టిసారించి ఆదుకోవాలని వారు కోరారు.