భూసర్వేను అడ్డుకున్న రైతులు

తహసీల్దారు సుభానితో చర్చిస్తున్న రైతులు

చాపాడు, న్యూస్‌టుడే : విజయవాడ-బెంగళూరు గ్రీన్‌ఫీల్డ్‌ ఎక్స్‌ప్రెస్‌ హైవే నిర్మాణానికి భూసేకరణలో అధికారులకు అడ్డంకులు ఎదురవుతూనే ఉన్నాయి. శనివారం పిచ్చపాడు రెవెన్యూ పరిధిలోని ద్వారకానగరం వద్ద కొలతలు వేయడానికి వచ్చిన రెవెన్యూ అధికారులను రైతులు అడ్డుకున్నారు. పోలీసు బందోబస్తు మధ్య కొలతలు వేయాలని చూసినా, గ్రామస్థులు అంగీకరించలేదు. రూ.కోట్లలో విలువ చేసే భూములను ఎకరా రూ.లక్షల్లో తీసుకోవడం న్యాయం కాదని రైతులు ఆరోపించారు. తమకు ఎలాంటి నోటీసులు ఇవ్వకుండా భూముల్లో కొలతలు సేకరించడం దారుణమన్నారు. ఉన్నతాధికారులు స్పందించి న్యాయం చేసే వరకు సహకరించమన్నారు. అనంతరం రైతులతో తహసీల్దారు సుభాని చర్చలు జరిపారు.