ఇదేనా పేదలపై ప్రభుత్వానికున్న ప్రేమ?

మదనపల్లె పట్టణం, న్యూస్‌టుడే : కాలనీల్లో నివసించే పేద ప్రజలకు కనీస సౌకర్యాలు కల్పించడంలో ప్రభుత్వం విఫలమైందని జనసేన పార్టీ రాయల, దక్షిణ కోస్తా పార్లమెంటరీ సమన్వయకర్త మైఫోర్స్‌ మహేశ్‌ అన్నారు. ఇంటింటికీ పాదయాత్ర కార్యక్రమంలో భాగంగా వారం రోజులుగా మదనపల్లె మండలం బీకే పల్లెలో ప్రతి ఇంటికి వెళ్లి ప్రచారం చేశారు. ఇందులో భాగంగా గురువారం రాత్రి కాలనీలో పర్యటించి ప్రతి ఇంటికి వెళ్లి జనసేన పార్టీ పేద ప్రజల సంక్షేమం కోసం చేపట్టే సంక్షేమ పథకాలను గురించి వివరించారు. అలాగే కాలనీలో నెలకున్న సమస్యలను అడిగి తెలుసుకున్నారు. రోడ్లు, మురుగు కాలువలు, వీధి దీపాలు వంటి కనీస సౌకర్యాల కల్పనలో ఏ పాలక ప్రభుత్వం దయ చూపలేదని స్థానికులు మహేశ్‌ ఎదుట వాపోయారు. 2004లో ఏర్పడిన ఈ కాలనీకి నేటికీ రోడ్లు లేకపోవడం చాలా బాధాకరమన్నారు. బీకే పల్లెలోని సమస్యలను కలెక్టర్‌ దృష్టికి తీసుకెళ్లి పరిష్కారానికి తన వంతు కృషి చేస్తానని, అవసరమైతే జనసేన పార్టీ ఆధ్వర్యంలో పోరాటం సాగించి పేదప్రజలకు న్యాయం జరిగే వరకు పోరాడుతానని మహేశ్‌ తెలిపారు. జనసైనికులు పాల్గొన్నారు.