గ్యాస్‌ లీకై మహిళ సజీవ దహనం

అగ్నిప్రమాదంలో కాలిపోయిన ఇల్లు

కడప, నేరవార్తలు, న్యూస్‌టుడే: నగరంలోని హౌసింగ్‌బోర్డు కాలనీలోని ఓ ఇంటి రెండో అంతస్థులో గ్యాస్‌ లీకై మంటలు వ్యాపించి అందులో చిక్కుకున్న గంగమ్మ (48)  సజీవ దహనమయ్యారు. సోమవారం ఉదయం తొమ్మిది గంటల సమయంలో పెద్ద శబ్దం రావడంతో స్థానికులు ఇంట్లోకి వెళ్లి చూడగా అప్పటికే గంగమ్మ మంటల్లో చిక్కుకుని కేకలు వేస్తున్నారు. వెంటనే ఆమెను బయటకు తీసి 108లో రిమ్స్‌ ఆసుపత్రికి తరలించగా అప్పటికే ఆమె మృతి చెందినట్లు వైద్యులు తెలిపారు. విషయం తెలుసుకున్న అగ్నిమాపక సిబ్బంది సంఘటనా స్థలానికి వెళ్లి మంటలు ఆర్పివేశారు. ఎస్‌.ఐ.రంగస్వామి కేసు నమోదు చేసి దర్యాప్తు చేస్తున్నారు.