Amaravati Padayatra: ఆంక్షలు దాటుకుంటూ ‘మహాపాదయాత్ర’ ముందుకు..

పొదలకూరు: అమరావతి రైతులు, మహిళలు చేస్తున్న ‘మహాపాదయాత్ర’ 32వ రోజు కొనసాగుతోంది. నెల్లూరు జిల్లా పొదలకూరు మండలం మర్రిపల్లె నుంచి ప్రారంభమైన ఇవాళ్టి యాత్ర 14కి.మీ మేర సాగి తురిమెర్ల వద్ద ముగియనుంది. తుమ్మలతలుపూరు వద్ద రైతులు మధ్యాహ్న భోజనం చేయనున్నారు. ‘న్యాయస్థానం నుంచి దేవస్థానం’ పేరుతో చేపట్టిన యాత్రలో తెదేపా, భాజపా నేతలు పాల్గొని సంఘీభావం తెలిపారు. పోలీసుల ఆంక్షలు దాటుకొని ప్రజల మద్దతుతో యాత్ర ముందుకు సాగుతోందని రైతులు చెబుతున్నారు.

రాజకీయ పార్టీల మద్దతుతో పాటు స్థానికుల నుంచి యాత్రకు అపూర్వ స్పందన లభిస్తోందని అమరావతి ఐకాస నేతలు తెలిపారు. అమరావతి పరిరక్షణ సమితి, రాజధాని ఐక్య కార్యాచరణ సమితి ఆధ్వర్యంలో నిర్వహిస్తున్న యాత్ర 45 రోజుల పాటు కొనసాగనుంది. గుంటూరు, ప్రకాశం, నెల్లూరు, చిత్తూరు జిల్లాల్లోని 70 ప్రధాన గ్రామాల మీదుగా డిసెంబరు 15కు తిరుపతికి చేరనుంది.