తిరుపతమ్మ రంగుల ఉత్సవంలో మార్పులు

పెనుగంచిప్రోలు, న్యూస్‌టుడే: ఈ నెల 20వ తేదీ నుంచి నిర్వహించనున్న పెనుగంచిప్రోలు తిరుపతమ్మ రంగుల ఉత్సవంలో స్పల్ప మార్పులు చేస్తున్నట్లు ఈవో కె. శోభారాణి సోమవారం ఒక ప్రకటనలో తెలిపారు. కొవిడ్‌ నేపథ్యంలో రాత్రి 11 గంటల నుంచి తెల్లవారుజామున 5 గంటల వరకు కర్ఫ్యూ విధించినందున దేవతామూర్తుల విగ్రహాలను జగ్గయ్యపేట తీసుకెళ్లే సమయాల్లో మార్పులు చేసినట్లు చెప్పారు. సోమవారం తహసీల్దారు నాగభూషణం అధ్యక్షతన ఆలయ ఛైర్మన్‌ యింజం చెన్నకేశవరావు, అధికారులతో సమావేశం నిర్వహించారు. 20న ఆలయంలోని విగ్రహాలను తెల్లవారుజామున 6 గంటలకు బయటకు తీస్తారు. 11.30 గంటలకు గ్రామంలోని రంగుల మండపం వద్దకు తీసుకువస్తారు. మధ్యాహ్నం 1.30 గంటలకు ఎడ్ల బళ్లు ఎక్కించి జగ్గయ్యపేట బయలుదేరుతారు. రాత్రి 9.30 గంటలకు జగ్గయ్యపేట రంగుల మండపానికి చేరుకునేలా సమయ ప్రణాళిక తయారు చేశారు. ఈ విషయమై ఎడ్ల బళ్ల యజమానులతో కూడా అధికారులు చర్చించారు. ఈఈ వైకుంఠరావు, పర్యవేక్షకులు ఉమాపతి, రెవెన్యూ అధికారులు పాల్గొన్నారు.