ఆర్టీసీ బస్సును ఢీకొన్న కారులో గంజాయి

రావులపాలెం పట్టణం, న్యూస్‌టుడే: రావులపాలెం మండలం రావులపాడు ఆర్టీసీ డిపో వద్ద జాతీయ రహదారిపై ఆర్టీసీ బస్సును ఓ కారు బలంగా ఢీకొంది. పోలీసులు తెలిపిన వివరాల ప్రకారం.. మరమ్మతులకు గురైన ఆర్టీసీ బస్సును మరో బస్సు సాయంతో డిపోలోకి తీసుకువెళుతుండగా మంగళవారం తెల్లవారుజామున రాజమహేంద్రవరం వైపునుంచి వస్తున్న కారు వేగంగా వచ్చి ఢీకొట్టింది. కారులో విజయవాడకు చెందిన ఏడుగురు వ్యక్తులున్నట్లు గుర్తించారు. వారిలో సూర్య, వంశీలకు తీవ్రగాయాలు కావడంతో రాజమహేంద్రవరం ప్రభుత్వాసుపత్రిలో చేర్చారు. పి.శశికుమార్‌, ఎన్‌.సంపత్‌, ఎం.విజయకుమార్‌, శ్రీను పోలీసుల అదుపులో ఉండగా ఫయాజ్‌ పరారయ్యాడు. వీరు విశాఖ జిల్లా పాడేరు నుంచి గంజాయి తీసుకుని విజయవాడ వెళుతున్నారు. కారులో 10 కేజీల సరకు ఉందని, రోడ్డు ప్రమాదంపై కేసు నమోదుచేసి దర్యాప్తు చేస్తున్నట్లు ఎస్సై భానుప్రసాద్‌ తెలిపారు.