నాలుగు రోజుల్లో 4,790 కేసులు

గుంటూరు వైద్యం, న్యూస్‌టుడే: జిల్లాలో కరోనా మూడో దశ విరుచుకుపడుతోంది. కేవలం నాలుగు రోజుల వ్యవధిలో 4,790 కేసులు నమోదయ్యాయి. ఇంత తక్కువ వ్యవధిలో ఈ స్థాయిలో కేసులు నమోదవడం ఇదే తొలిసారి. గతంతో పోలిస్తే ఇప్పుడు వైరస్‌ వ్యాప్తి అత్యంత వేగంగా, తీవ్రంగా ఉండడంతో తక్కువ రోజుల్లో ఎక్కువ కేసులు నమోదవుతున్నట్లు వైద్యులు తెలుపుతున్నారు. తాజాగా 24 గంటల వ్యవధిలో జిల్లా వ్యాప్తంగా 1,458 మంది కొవిడ్‌ బారిన పడ్డారు. జిల్లాలో నమోదైన కొత్త కేసుల్లో 69.82 శాతం కేసులు గుంటూరు, మంగళగిరి, తాడేపల్లి, నరసరావుపేట, తెనాలి పరిధిలోనే వచ్చాయి. రోజురోజుకు ఇక్కడ నమోదవుతున్న కేసుల సంఖ్య పెరుగుతోంది. అందువల్ల ఈ ప్రాంతాల్లో కరోనా కట్టడికి కఠినమైన చర్యలు చేపట్టాల్సిన అవసరం ఉందని నిపుణులు సూచిస్తున్నారు.