బాలికతో వ్యభిచారం కేసులో కీలక మలుపు

ఈనాడు-అమరావతి: గుంటూరు, విజయవాడ, ఒంగోలు, నెల్లూరుతో పాటు హైదరాబాద్‌ ప్రాంతాల్లో ఓ బాలికతో వ్యభిచారం చేయించినట్లు ఇటీవల అరండల్‌పేట పోలీసుస్టేషన్‌లో కేసు నమోదైన విషయం తెల్సిందే. రిమాండ్‌ రిపోర్టులో కొందరి పేర్లే ఉన్నాయని, మరికొందరి పేర్లు అందులో లేవని, వారి వద్దకు తనను పంపినట్లు ఆ బాలిక జడ్జికి వాంగ్మూలం ఇచ్చినట్లు తాజాగా వెలుగులోకి వచ్చింది. మొత్తంగా ఈ కేసు ప్రస్తుతం అనేక మలుపులు తిరుగుతోంది. మిగిలిన వ్యభిచార నిర్వాహకులు, విటులను పట్టుకోవాలని జడ్జి ఆదేశించారు. దీంతో అరండల్‌పేట పోలీసులు నిందితుల కోసం పలు ప్రాంతాలకు వెళ్లి ఆరా తీస్తున్నారు.

కేసు పూర్వాపరాలు...

ఈ కేసులో బాధితురాలైన బాలిక, ఆమె తల్లి ఇద్దరూ గతేడాది జూన్‌లో కరోనా వైరస్‌బారిన పడి జీజీహెచ్‌లో చేరారు. చికిత్స పొందుతూ తల్లి చనిపోయింది. ఆ బాలిక ఆలన, పాలన తండ్రే చూస్తున్నారు. అప్పట్లో ఆసుపత్రిలో పరిచయమైన ఓ మహిళ తనకు పిల్లలు లేరని, కరోనా తగ్గుముఖానికి నాటు వైద్యం చేయిస్తానని బాలిక తండ్రికి మాయమాటలు చెప్పి ఆ బాలికను తీసుకెళ్లింది. కొద్దిరోజుల అనంతరం ఆ బాలికను గుంటూరు, నెల్లూరు, విజయవాడలోని వ్యభిచార గృహాలకు తీసుకెళ్లి బలవంతంగా వ్యభిచారం చేయించింది. ఈ క్రమంలో ఒక రోజు విజయవాడ నుంచి తప్పించుకుని ఆ బాలిక పేరేచర్లలో ఉంటున్న తండ్రి వద్దకు వచ్చి తనను ఇంట్లో బంధించి వ్యభిచారం చేయించినట్లు చెప్పడంతో మేడికొండూరు పోలీసులకు ఫిర్యాదు చేశారు. తొలుత జీరో ఎఫ్‌ఐఆర్‌ నమోదు చేసి కేసును ఆ తర్వాత అరండల్‌పేటకు బదిలీ చేశారు. ఆ బాలిక కొత్తగా చెప్పిన వారందరిని పట్టుకురావాలని ఆదేశించటంతో స్టేషన్‌లో ఎస్సైలు బృందంగా ఏర్పడి వేర్వేరు ప్రాంతాల్లో వ్యభిచార నిర్వాహకులు, విటుల కోసం గాలిస్తున్నారని పోలీసు అధికారి ఒకరు చెప్పారు.