logo

సాగరం మింగిన ఊళ్లు

ఉదయాన్నే నిద్ర లేచి, తలుపులు తెరిచి బయట అడుగు పెట్టగానే గుమ్మం వద్దే సముద్రం అలలు కనిపిస్తే .. ఒక్కసారిగా గుండె జారక మానదు. ఇటువంటి భయానక పరిస్థితులు ఏళ్లుగా అక్కడి  మత్స్యకారులు ఎదుర్కొంటున్నారు. ముందుకొస్తున్న కెరటాలు తమ భూములను, ఇళ్లను ముంచేసి సాగర గర్భంలో కలిపేసుకుంటుంటే మౌనంగా రోదించడం తప్ప గత్యంతరం లేని పరిస్థితి.

Updated : 11 Jul 2024 05:21 IST

ఇప్పటివరకు 1360 ఎకరాలు మాయం
కొత్తపల్లి తీరంలోని 8 గ్రామాల్లో అలల కల్లోలం
రూ.250 కోట్లతో ఉప్పాడ తీర ప్రాంత రక్షణ కవచానికి ప్రణాళిక
ఈనాడు, కాకినాడ

యు.కొత్తపల్లి మండలం ఉప్పాడలో కోతకు గురైన తీరం

ఉదయాన్నే నిద్ర లేచి, తలుపులు తెరిచి బయట అడుగు పెట్టగానే గుమ్మం వద్దే సముద్రం అలలు కనిపిస్తే .. ఒక్కసారిగా గుండె జారక మానదు. ఇటువంటి భయానక పరిస్థితులు ఏళ్లుగా అక్కడి  మత్స్యకారులు ఎదుర్కొంటున్నారు. ముందుకొస్తున్న కెరటాలు తమ భూములను, ఇళ్లను ముంచేసి సాగర గర్భంలో కలిపేసుకుంటుంటే మౌనంగా రోదించడం తప్ప గత్యంతరం లేని పరిస్థితి. గంగమ్మనే  నమ్ముకుని బతుకీడుస్తున్న ఈ కుటుంబాలు కష్టాలకు ఎదురొడ్డి బతుకు నావ నడిపిస్తున్నాయి. ఓ వైపు ప్రకృతి ప్రకోపం.. మరోవైపు మానవ తప్పిదాలే కోత తీవ్రత నానాటికీ పెరగడానికి కారణమన్నది నిపుణుల మాట. కాకినాడ జిల్లా ఉప్పాడ కొత్తపల్లి మండలంలో పలు గ్రామాలను వేధిస్తున్న సమస్య ఇది. సమీప పల్లెల్లో ప్రజలకు జీవనాధారమైన భూములు.. ఉప్పాడలో నివాసాలు సముద్రంలో కలిసిపోతుండడం తీవ్రంగా కలవరపెడుతోంది.

ఏమయ్యాయి ఆ ఇళ్లు.. రోడ్లు

అక్కడో ఇల్లుండేది.. కానీ ఇప్పుడు లేదు.. అక్కడో గుడి ఉండేది.. ఇప్పుడు లేదు.. గతంలో ఉన్న బంగ్లా, విశాలమైన రోడ్లు, తాగునీటి వనరుల జాడే లేదు. సముద్రుడు క్రమేపీ ముందుకొస్తుండడంతో వేల ఎకరాల భూములు, నిర్మాణాలూ దానిలో కలిసిపోతున్నాయి. 1956 నాటికి ఉప్పాడ తీరంలో 23.84 ఎకరాలు కోతకు గురైనట్లు గుర్తిస్తే.. అప్పట్నుంచి ఇప్పటివరకు మరో 60.67 ఎకరాలు సముద్రంలో కలిసిపోయిందని అధికారిక గణాంకాలు చెబుతున్నాయి.

ఆ తప్పు.. ఇక్కడ ముప్పు.. 

సముద్రం పోటు సమయంలో ముందుకు దూసుకొచ్చి తీరాన్ని కోతకు గురిచేస్తూ.. నివాసాలను ధ్వంసం చేస్తుండడమే ఇక్కడున్న సమస్య.. యు.కొత్తపల్లి మండలంలో కొమరిగిరి నుంచి కోనపాపపేట వరకు 15 కి.మీ..మేర తీరం ఉంటే సమస్య తీవ్రత ఉప్పాడలో అధికం. గత అయిదేళ్లలో 400 ఇళ్లు సముద్రంలో కలిసిపోయాయి. సర్వం కోల్పోయి మత్స్యకారులు ఇతరుల ఇళ్లలో తలదాచుకోవాల్సిన పరిస్థితి. తీరం కోతకు గురవకుండా రాళ్లు వేస్తున్నా.. రూ.12 కోట్లు వెచ్చించి జియోట్యూబ్, గేబియన్‌ బాక్సులు వేసినా.. ఈ పనులు సమర్థంగా సాగకపోవడంతో సమస్య మొదటికొచ్చింది.

కాకినాడ పోర్టులో నౌకల రాకపోకలకు వీలుగా డ్రెడ్జింగ్‌ చేస్తుంటారు. ఏటా 10 లక్షల క్యూబిక్‌ మీటర్లు తవ్వి కోత సమస్య ఉన్న ఉప్పాడ తీరంలో వేయకుండా సముద్రం లోపలే పడేస్తున్నారు. విశాఖ తరహాలో పైపుల ద్వారా ఉప్పాడ తీరానికి తరలించి ఆరు లక్షల క్యూబిక్‌ మీటర్లు ఇసుక వేస్తే కోత ఆగేది. అలానే రక్షణ గోడల నిర్మాణం జరిగితే శాశ్వత పరిష్కారమూ దొరికేది.

ఎన్‌సీసీఆర్‌ అధ్యయనం ఏం చెబుతుందంటే..

నేషనల్‌ సెంటర్‌ ఫర్‌ కోస్టల్‌ రీసెర్స్‌ (ఎన్‌సీసీఆర్‌) ఉపగ్రహ, క్షేత్రస్థాయి సర్వే సమాచారం ఆధారంగా తీరం వెంట మార్పులపై అధ్యయనం చేసింది. 1990- 2018 మధ్య ప్రధాన భూభాగంలో 6,907.18 కి.మీ తీరాన్ని మ్యాప్‌ చేసింది. 28.7 శాతం తీరం కోతకు గురైందని.. 21.7 శాతం స్థిరంగా ఉందని గుర్తించింది. సమస్యాత్మక జాబితాలో కొత్తపల్లి, సఖినేటిపల్లి మండలాల తీర ప్రాంతాలు ఉన్నాయి. ఉప ముఖ్యమంత్రి పవన్‌కల్యాణ్‌ సూచన మేరకు చెన్నైకి చెందిన ఎన్‌సీఆర్‌ నిపుణుల బృందం ఉప్పాడ తీరంలో కోత కట్టడికి 20ఏళ్లకు సరిపడా ప్రణాళిక సిద్ధంచేసింది. తీవ్రత ఉన్నచోట రక్షణ గోడ,, ఉప్పాడ వద్ద గ్రోయన్‌ నిర్మాణానికి రూ.200 కోట్ల నుంచి రూ.250 కోట్ల వరకు ఖర్చవుతుందని పేర్కొన్నారు. కేంద్రం ఊతమిస్తే సమస్యకు పరిష్కారం దొరుకుతుంది.

ఉప్పాడలో కోతకు గురైన విస్తీర్ణం 84.51
ఎకరాలు ఇందులో 1956 సంవత్సరం వరకు కోతకు గురైనది 23.84 ఎకరాలు
ఆ తర్వాత నుంచి ఇప్పటివరకు 60.67 ఎకరాలు

గ్రామం.. కోతకు గురైన ప్రాంతం (ఎకరాల్లో..)

కొమరగిరి 362.83
మూలపేట 359.78
కోనపాపపేట 233.56
సుబ్బమ్మపేట 141.30
అమరవిల్లి 133.50
ఉప్పాడ 84.51
అమీనాబాద్‌ 32.26
రమణక్కపేట 13.01
మొత్తం 1,360.75


ఇలా చేస్తే మనకూ సాధ్యమే

ఈ నగరంలోని ప్రసిద్ధ ఆర్‌కే బీచ్‌ను కోత సమస్య వేధించేది. అక్కడి పోర్టు యాజమాన్యం డ్రెడ్జింగ్‌ కార్యకలాపాలు జరిపేటప్పుడు వెలికి తీసిన ఇసుకను సముద్రంలోనే వదిలేయకుండా ప్రత్యేక పైపులైను ద్వారా తీరానికి
చేర్చడంతో బాగుపడింది.. దీనికితోడు ప్రభుత్వం రక్షణగోడ నిర్మించడంతో పర్యాటకుల అసౌకర్యం తీరి సేదతీరేందుకు వెసులుబాటు దక్కింది.

పర్యాటకులు ఎక్కువగా సందర్శించే ప్రొమినేడ్‌ బీచ్‌లో కోత సమస్య తీవ్రంగా ఉండేది. గ్రోయన్‌ నిర్మాణంతోపాటు.. ఏటా మూడు లక్షల క్యూబిక్‌ మీటర్ల ఇసుక తీరంలో వేస్తూ కోతకు కట్టడి చేశారు.

అరేబియా సముద్ర తీరం.. కేరళ బ్యాక్‌ వాటర్‌ మధ్య ఉన్న కేరళలోని చెల్లానం తీరాన్ని కోత ఉక్కిరిబిక్కిరి చేసేది. ఏటా వరదలూ సరేసరి.. సముద్ర కెరటాలు ఎత్తుగా ఎగసిపడే పరిస్థితి ఉన్న ఇక్కడ రూ.320 కోట్లు వెచ్చించి ఆరు కి.మీ మేర రక్షణ గోడ నిర్మించారు. దీంతో రెండేళ్లుగా కోత, ముంపు సమస్య జాడ లేదు.


తీరం కోత కట్టడికి ప్రణాళిక

మానవ తప్పిదాలు, వాతావరణంలో మార్పులతో 2010 నుంచి సముద్ర మట్టం పెరుగుతోంది. పోర్టుల కార్యకలాపాల వల్ల కెరటాల ఉద్ధృతి ఓవైపు పెరగడం... ఎగువన డ్యాములు కట్టడం వల్ల కిందికి వస్తున్న ఇసుక నిల్వలు తగ్గడం సమస్యకు కారణం.. పోర్టుల్లో డ్రెడ్జింగ్‌ ద్వారా సేకరిస్తున్న ఇసుకను సమస్య ఉన్న తీరంలో వేస్తే బీచ్‌ ఏర్పాటై కోత తీవ్రత తగ్గుతుంది. ఇటీవల ఉప ముఖ్యమంత్రి ఉప్పాడ తీరం కోత నివారణకు, రహదారి నిర్మాణానికి బృహత్తర ప్రణాళిక తయారుచేయమన్నారు. సమస్యకు పరిష్కారం చూపుతూ నివేదిక అందించాం.

ఎం.వి.రమణమూర్తి, డైరెక్టర్, జాతీయ తీర ప్రాంత పరిశోధన కేంద్రం-చెన్నై  

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని