మృతి చెందిన అరుణ్‌బాబు

పరవాడ, న్యూస్‌టుడే: స్నేహితులతో సరదాగా గడపడానికి సముద్ర తీరానికి వచ్చిన సాఫ్ట్‌వేర్‌ ఉద్యోగి కెరటాల ఉద్ధృతికి తాళలేక మృతి చెందాడు. ఆ ఘటన పరవాడ మండలం తిక్కవానిపాలెం తీరంలో చోటు చేసుకుంది. పరవాడ ఎస్సై రమేశ్‌ తెలిపిన వివరాలు ఇలా ఉన్నాయి. చినగంట్యాడ వుడాకాలనీకి చెందిన పెదిరెడ్డి అరుణ్‌బాబు(27), అతని స్నేహితులు శివగుప్తా, వినోద్‌కుమార్‌, అనిల్‌సాహు సోమవారం ఉదయం 5గంటలకు కారులో తిక్కవానిపాలెం బీచ్‌కు వచ్చారు. కొంత సమయం సరదాగా గడిపారు. 8.30గంటల సమయంలో అరుణ్‌బాబు, శివగుప్తా తీరంలో ఈతకు దిగగా బలమైన కెరటం రావడంతో లోపలికి కొట్టుకుపోయారు. ఈ దృశ్యం చూసి మిగతావారు పెద్దగా కేకలు వేయడంతో స్థానిక మత్స్యకారులు అక్కడికి చేరుకుని శివగుప్తాను రక్షించి ఒడ్డుకి చేర్చారు. అరుణ్‌బాబు మృతి చెందగా, కొంత సమయం తర్వాత మృతదేహం ఒడ్డుకి కొట్టుకొచ్చింది. మృతదేహాన్ని పోస్టుమార్టం నిమిత్తం అనకాపల్లి ఎన్టీఆర్‌ ఆసుపత్రికి తరలించారు. అరుణ్‌బాబు బీటెక్‌ పూర్తి చేసి బెంగళూరులోని ఓ కంపెనీలో సాఫ్ట్‌వేర్‌ ఇంజినీర్‌గా పని చేస్తున్నారు. కొవిడ్‌ కారణంగా ఏడాదిగా ఇంటి నుంచే విధులు (వర్క్‌ఫ్రం హోం) నిర్వర్తిస్తున్నారు. తండ్రి కొన్నేళ్ల క్రితం చనిపోయారు. తల్లి నీరజ, చెల్లి లావణ్య ఉన్నారు. అతనికి వివాహం కాలేదు. ఇంటికి పెద్దదిక్కు అయిన అరుణ్‌బాబు మృతి చెందడంతో కుటుంబ సభ్యులు కన్నీరుమున్నీరుగా విలపించారు. సీఐ ఉమామహేశ్వరరావు ఆధ్వర్యంలో ఎస్సై అప్పారావు కేసు నమోదు చేసి దర్యాప్తు చేస్తున్నారు.