AP News: పండగ తర్వాత గ్రామాలు ఖాళీ చేయాల్సిందే!

నిర్వాసితులతో మాట్లాడుతున్న ఆర్డీవో

డెంకాడ, భోగాపురం, న్యూస్‌టుడే: అంతర్జాతీయ విమానాశ్రయ భూసేకరణకు సంబంధించి భోగాపురం మండలం బొల్లింకలపాలెం, రెల్లిపేట గ్రామాలు పండగ తర్వాత ఖాళీ చేయాలని ఆర్డీవో భవానీ శంకర్‌ నిర్వాసితులను ఆదేశించారు. మండల పరిషత్‌ కార్యాలయంలో సోమవారం ఆయన మాట్లాడుతూ.. ఆయా గ్రామాల వారికి ఆర్‌అండ్‌ఆర్‌ ప్యాకేజీ పూర్తిగా చెల్లిస్తామని, 3 నెలల అద్దె కూడా ఇస్తామని చెప్పారు.అందుకు నిర్వాసితులు అభ్యంతరం తెలపడంతో వారికి అధికారులకు మధ్య కొంతసేపు వాగ్వాదం చోటుచేసుకుంది. ఖాళీ చేయడానికి తమకు కొంత సమయం కావాలని నిర్వాసితులు కోరారు. ప్రస్తుతం నిర్మిస్తున్న ఇళ్లకు బిల్లులు సక్రమంగా అందడం లేదని వాపోయారు. చర్చలు విఫలం కావడంతో అధికారులు సమావేశాన్ని ముగించి వెళ్లిపోయారు. తహసీల్దారు రమణమ్మ, డీటీ గాంధీ, రెవెన్యూ అధికారులు, నిర్వాసితులు పాల్గొన్నారు.