చిన్నారి లేఖాస్త్రం.. కాలిబాట సాకారం: కేటీఆర్‌ ట్వీట్‌తో స్పందించిన అధికారులు

కార్తికేయతో మాట్లాడుతున్న బల్దియా అధికారులు

ఈనాడు, హైదరాబాద్‌: ఇంటి ముందు కాలిబాట కోసం చేపట్టిన పనులను అసంపూర్తిగా వదిలేశారని కార్తికేయ అనే చిన్నారి ప్రస్తావించగా మంత్రి కేటీఆర్‌ వెంటనే స్పందించారు. సికింద్రాబాద్‌ బౌద్ధనగర్‌కు చెందిన ఈ బాలుడు సమస్యను ప్రస్తావిస్తూ రాసిన లేఖను అతని మామయ్య.. మంత్రి కేటీఆర్‌కు ట్వీట్‌ చేయగా.. మంత్రి స్పందించారు. సికింద్రాబాద్‌ జోనల్‌ కమిషనర్‌ను క్షేత్రస్థాయికి వెళ్లి పరిశీలించాలని ఆదేశించారు. వెంటనే జడ్సీ శ్రీనివాస్‌రెడ్డి, ఉపకమిషనర్‌ మోహన్‌రెడ్డి, ఇంజినీర్లు కలిసి ఆ బాలుడి ఇంటికెళ్లారు. అతనితో మాట్లాడి.. కాలిబాటను త్వరగా పూర్తిచేస్తామని హామీ ఇచ్చారు. మంత్రి కేటీఆర్‌ సంబంధిత అధికారులకు ధన్యవాదాలు తెలిపారు.