Bheemla Nayak: ‘భీమ్లానాయక్‌ చిత్రంలో ఆ సన్నివేశం తొలగించండి’

 ఏపీ కుమ్మరి, శాలివాహన కార్పొరేషన్‌ ఛైర్మన్‌ పురుషోత్తం
 గుంటూరు అర్బన్‌ ఎస్పీకి ఫిర్యాదు

మాట్లాడుతున్న పురుషోత్తం

గుంటూరు నేరవార్తలు, న్యూస్‌టుడే: భీమ్లానాయక్‌ చిత్రంలో కుమ్మరుల మనోభావాలు దెబ్బతినేలా చిత్రీకరించిన ఒక సన్నివేశం తొలగించాలని ఏపీ కుమ్మరి, శాలివాహన కార్పొరేషన్‌ ఛైర్మన్‌ ఎం.పురుషోత్తం డిమాండ్‌ చేశారు. ఈమేరకు సోమవారం గుంటూరు అర్బన్‌ ఎస్పీ ఆరిఫ్‌ హఫీజ్‌కు ఫిర్యాదు చేశారు. అనంతరం ఆయన విలేకరులతో మాట్లాడారు. ‘పవన్‌ కల్యాణ్‌ కథానాయకుడిగా నటించిన భీమ్లానాయక్‌ చిత్రంలో ప్రతి నాయకుడు దగ్గుబాటి రానా కుమ్మరి చక్రంను కాలితో తన్ని తన ప్రత్యర్థిపై దాడి చేసినట్లు చిత్రీకరించారు. తాము ఎంతో పవిత్రంగా భావించే కుమ్మరి చక్రంను కాలితో తన్నిన సన్నివేశం తమను కించపరిచేలా, కుమ్మరుల మనోభావాలు దెబ్బతీసేలా ఉంది. చిత్ర దర్శకులు, నిర్మాత, కథానాయకులపై చర్యలు తీసుకుని ఆ సన్నివేశం వెంటనే తొలగించేలా చూడాలని ఫిర్యాదు చేశానని’ తెలిపారు.