ఏకాంతంగా మాట్లాడుకుందాం.. వివాహ వేదికల ద్వారా పరిచయమైన యువతులపై వల

రిసార్ట్‌లకు వెళ్దామంటూ పిలిచి..

పెళ్లికాని యువతులపై కొందరు యువకులు నయవంచక వల విసురుతున్నారు. అంతర్జాల వివాహ వేదికల ద్వారా పరిచయమవుతూ పెళ్లి సంబంధాల పేరుతో యువతుల ఇళ్లకు వెళ్తున్నారు. వివాహానికి ముందే కొన్ని వ్యక్తిగత వివరాలు పంచుకుందామంటూ అభ్యర్థిస్తూ.. ఏకాంతంగా మాట్లాడుకుందామంటూ ప్రతిపాదిస్తున్నారు. బెంగళూరు, ముంబయి, గోవాలకి.. లేదంటే హైదరాబాద్‌ శివార్లలోని రిసార్ట్‌లకు వెళ్దామంటూ కోరుతున్నారు. అక్కడికి వెళ్లాక వికృతరూపం ప్రదర్శిస్తున్నారు. పెళ్లికి ముందే లైంగిక కోర్కెలు తీర్చాలంటూ బలవంతం చేస్తున్నారు. బాధితుల్లో కొందరు ‘షి’ బృందాలకు ఫిర్యాదు చేస్తుండడంతో వెలుగులోకి వస్తున్నాయి. ఈ ఘటనల దృష్ట్యా అంతర్జాల వివాహ వేదికల ద్వారా పరిచయమైన యువకులతో ఒంటరిగా వెళ్లకూడదంటూ ‘షి’ బృందాలు హెచ్చరిస్తున్నాయి. పెళ్లికి ముందే ఇద్దరమే బయటకు వెళ్దామని యువకులు ప్రతిపాదిస్తే నో చెప్పాలని సూచిస్తున్నారు. ఏకాంతం పేరుతో కొందరు యువతుల పట్ల దారుణంగా ప్రవర్తించారని, బాధితులు ఆవేదనతో వివరాలు చెప్పారని వివరించారు. మెట్రో నగరాల్లో ఉండే యువతులకు పెద్దగా పట్టింపులు ఉండవు.. ఎక్కడికైనా వచ్చేస్తారన్న అంచనాతో కొందరు యువకులు ఇలా వల విసురుతున్నారని, ఇలాంటి వారి పట్ల జాగ్రత్తగా ఉండాలని హెచ్చరిస్తున్నారు.