Andhra News: నమ్మండి... ఇది జగనన్న కాలనీయే!

ఈ చిత్రంలో ముళ్లకంపలతో నిండి ఉన్న ప్రాంతం జగనన్న కాలనీ పేరుతో పేదలకు ఇచ్చిన ఇంటి స్థలాలు. 2020 డిసెంబరు 25న అనంతపురం జిల్లా బుక్కరాయసముద్రం గోవిందపల్లి గ్రామంలో 30 మందికిపైగా లబ్ధిదారులకు ప్రభుత్వం ఇళ్ల పట్టాలు ఇచ్చింది. రెండేళ్లవుతున్నా కాలనీలో తాగునీరు, విద్యుత్తు సౌకర్యం కల్పించక పోవడంతో లబ్ధిదారులు కనీసం పునాది కూడా వేయలేదు. దీంతో ముళ్లకంపలు ఏపుగా పెరిగాయి. దీనికితోడు వర్షం వస్తే భారీగా నీరు నిలుస్తాయని గ్రామస్థులు చెబుతున్నారు. మరో ప్రదేశంలో స్థలాలు ఇవ్వాలని కోరుతున్నారు. రెవెన్యూ అధికారుల అనాలోచిత నిర్ణయం కారణంగా స్థలాలు వృథాగా మారాయి. ఈ విషయమై గృహనిర్మాణశాఖ ఏఈ వెంకటేశ్వరరావును వివరణ కోరగా వర్షం కురిస్తే కాలనీలో భారీగా నీరు నిలుస్తాయని లబ్ధిదారులు పునాదులు తవ్వడానికి ముందుకు రావడం లేదన్నారు. - న్యూస్‌టుడే, బుక్కరాయసముద్రం