కట్నకానుకల కింద రూ.47లక్షలు ఇచ్చారు.. అయినా..!

నవిత (దాచిన చిత్రం)

కడప, నేరవార్తలు, చింతకొమ్మదిన్నె, న్యూస్‌టుడే: పెళ్లై ఎనిమిది నెలలైంది.. ఎన్నో ఆశలతో అత్తింట్లో అడుగు పెట్టింది. పెళ్లైన కొద్ది రోజుల వరకు ఎంతో ప్రేమగా చూసుకున్నారు. పెళ్లికి కట్నకానుకల కింద రూ.47లక్షలు ఇచ్చారు. కొద్ది రోజుల నుంచి అధిక కట్నం తీసుకుని రావాలంటూ వేధింపులు మొదలయ్యాయి. భర్తతో పాటు అత్తమామలు వేధిస్తుండడంతో భరించలేక ఓ వివాహిత బలవన్మరణానికి పాల్పడిన ఘటన చింతకొమ్మదిన్నె మండలంలోని బృందావన్‌ కాలనీలో చోటు చేసుకుంది. ఎస్సై మంజునాథ్‌రెడ్డి వివరాల మేరకు.. సింహాద్రిపురం మండలం అంకాలమ్మ గూడూరుకు చెందిన లక్ష్మీనారాయణరెడ్డి కుమార్తె గుగ్గుళ్ల నవిత (25) ఎంబీఏ వరకు చదువుకున్నారు.

2021 ఆగస్టులో సీకే.దిన్నె మండల పరిధిలోని బృందావన్‌ కాలనీకి చెందిన గుగ్గుళ్ల బాబారెడ్డికి ఇచ్చి వివాహం చేశారు. బాబారెడ్డి వ్యాపారం చేస్తున్నాడు. నవిత ఓ కంపెనీలో పని చేస్తూ ప్రస్తుతం వర్క్‌ఫ్రం హోంగా విధులు నిర్వహిస్తున్నారు. ఇటీవల అదనపు కట్నం తీసుకుని రావాలంటూ భర్తతో పాటు అత్తమామలు వేధింపులకు గురి చేస్తుండేవారు. వేధింపులు తట్టుకోలేక గురువారం నవిత చివరిసారిగా తల్లిదండ్రులకు ఫోన్‌లో మాట్లాడారు. తరువాత ఆమె ఇంట్లో ఉరేసుకుని బలవన్మరణానికి పాల్పడ్డారు. విషయం తెలుసుకున్న పుట్టింటివారు ఆసుపత్రికి వచ్చి కన్నీరుమున్నీరుగా విలపించారు. సీకే.దిన్నె తహసీల్దారు విజయకుమార్‌ సమక్షంలో శవ పంచనామా నిర్వహించారు. నవిత తండ్రి లక్ష్మీనారాయణరెడ్డి ఇచ్చిన ఫిర్యాదు మేరకు పోలీసులు వరకట్న వేధింపుల కేసు నమోదు చేశారు.