ధిక్కరించి వివాహం.. కుమార్తెను పెళ్లి దుస్తుల్లోనే లాక్కెళ్లిన తల్లిదండ్రులు

అనన్య, అభిషేక్‌

మైసూరు, న్యూస్‌టుడే : తమ నిర్ణయాన్ని ధిక్కరించి పెళ్లి చేసుకున్న కుమార్తెను పెళ్లి దుస్తుల్లోనే తల్లిదండ్రులు లాక్కెళ్లిన సంఘటన మైసూరు జిల్లా హుణసూరులో బుధవారం చోటుచేసుకున్నట్లు పోలీసులు తెలిపారు. మండ్య జిల్లా నాగమంగల తాలూకా కదబహళ్లికి చెందిన అభిషేక్‌- చోళేనహళ్లి నివాసి అనన్య రెండేళ్లుగా ప్రేమికులు. వీరి ప్రేమను అనన్య కుటుంబ సభ్యులు తీవ్రంగా వ్యతిరేకించారు. ఈనేపథ్యంలో పోలీసుల సమక్షంలో నిరాడంబరంగా వివాహం చేసుకున్నారు. వివాహానంతరం ఓ హోటల్‌కు వెళ్తుండగా అనన్య తల్లిదండ్రులు, బంధువులు ఒక్కసారిగా దాడి చేసి ఆమెను లాక్కెళ్లారు. ఈ విషయాన్ని అభిషేక్‌ పోలీసులకిచ్చిన ఫిర్యాదులో పేర్కొన్నారు. హుణసూరు పోలీసులు కేసు దర్యాప్తును చేపట్టారు.