Crime News: మిమ్మల్ని చూడ్డానికే వచ్చానని టోకరా

నారాయణగూడ, న్యూస్‌టుడే: ‘కేవలం మిమ్మల్ని చూడడానికే ఇండియాకు వచ్చాను. విమానాశ్రయంలో పోలీసులు పట్టుకున్నారు.. తనను విడిపించాల’ని రూ.5.85 లక్షలు కొట్టేశారంటూ ఓ బాధితురాలు హైదరాబాద్‌ సైబర్‌ క్రైమ్‌ పోలీసు ఠాణాలో ఫిర్యాదు చేశారు. ఏసీపీ కె.వి.ఎం.ప్రసాద్‌ కథనం ప్రకారం.. బంజారాహిల్స్‌కు చెందిన ఓ యువతికి ఫేస్‌బుక్‌ ద్వారా ఓ వ్యక్తి పరిచయమయ్యాడు. యూకేలో పెద్ద వ్యాపారం చేస్తున్నానని, మీరు నచ్చారని చెప్పాడు. బాధితురాలు తిరస్కరించినా వదలకుండా సామాజిక మాధ్యమంలో వెంటపడ్డాడు. మిమ్మల్ని చూడటానికి ఇండియాకు వస్తున్నానని చెప్పాడు. రెండు రోజుల తరువాత విమానాశ్రయం నుంచి కస్టమ్స్‌ అధికారుల పేరుతో ఫోన్‌ చేశారు. ఓ వ్యక్తి చట్టవిరుద్ధంగా పెద్దమొత్తంలో విదేశీ కరెన్సీ తీసుకొచ్చాడు. దానికి ఎలాంటి పన్ను చెల్లించలేదు. ఎవరైనా తెలుసా అంటే మీ నంబరు ఇచ్చాడని చెప్పారు. ఆయన్ని వదలాలంటే కొంత డబ్బు కట్టాలని చెప్పి, విడతలవారిగా బాధితురాలి నుంచి రూ.5.85 లక్షలు కొట్టేశారు. తర్వాత ఆ ఫోన్‌ స్విచ్ఛాఫ్‌ కావడంతో బాధితురాలు హైదరాబాద్‌ సైబర్‌ పోలీసులకు ఫిర్యాదు చేశారు.