Cyber Crime: పెళ్లికి దాచుకున్నదంతా.. దోచుకున్నారు

నారాయణగూడ: అమెరికాలో ఉద్యోగం అనగానే తన పెళ్లి కోసం దాచుకున్న రూ.10 లక్షలను సైబర్‌ కేటుగాళ్లకు ముట్టజెప్పారు ఓ బాధితురాలు. హైదరాబాద్‌ సైబర్‌ క్రైమ్‌ ఏసీపీ కె.వి.ఎం.ప్రసాద్‌ తెలిపిన వివరాల ప్రకారం.. సికింద్రాబాద్‌ లాలాగూడకు చెందిన యువతి అమెరికాలో ఉద్యోగం కోసం అన్వేషణలో ఉన్నారు. అమెరికాలో ప్రముఖ రియల్‌ ఎస్టేట్‌ కంపెనీలో మేనేజర్‌ పోస్టు ఖాళీగా ఉందని నెలకు లక్షల్లో జీతం, హెచ్‌1బీ వీసా కూడా ఇప్పిస్తామని మెయిల్‌ వచ్చింది. బాధితురాలు స్పందించడంతో మరుసటి రోజే అమెరికాకు చెందిన వేర్వేరు ఫోన్‌ నంబర్లతో వాట్సాప్‌ కాల్‌ చేశారు. ప్రాసెసింగ్‌ ఫీజు కింద రూ.45 వేలు, వీసా కోసం, ఇన్సూరెన్స్‌కు, వర్క్‌ పర్మిట్‌కు, ఇలా మొత్తం రూ.10 లక్షలు దండుకున్నాడు. ఇంకా డబ్బులు కోరడంతో బాధితురాలు పోలీసులకు ఫిర్యాదు చేశారు. ‘మా అమ్మ చనిపోయే ముందు నా పెళ్లి కోసం దాచిన బంగారాన్నంతా అమ్మేసి ఇచ్చిన డబ్బని బాధితురాలు చెప్పడం కొస మెరుపు.