Hyderabad News: హైదరాబాద్‌లో ట్రాఫిక్‌ జాం.. యాప్‌తో పరిష్కారం

గూగుల్‌తో హైదరాబాద్‌ పోలీసుల ఒప్పందం

ఈనాడు, హైదరాబాద్‌

అత్యాధునిక సాంకేతిక సమాచార పరిజ్ఞానంతో వాహనాల రాకపోకలను నియంత్రిస్తున్న హైదరాబాద్‌ ట్రాఫిక్‌ పోలీసులు ట్రాఫిక్‌ జాంల పరిష్కారానికి కొత్త విధానాన్ని అమలు చేయనున్నారు. గూగుల్‌ సంస్థ ట్రాఫిక్‌ పోలీసులకు ప్రత్యేకంగా రూపొందించిన యాప్‌ను వినియోగించడం ద్వారా అనుకోకుండా జరిగే సంఘటనలు, వీవీఐపీల రాకపోకలు, ర్యాలీలు, ధర్నాలు కారణంగా అప్పటికప్పుడు ఉత్పన్నమయ్యే ట్రాఫిక్‌ జాంల ప్రభావాన్ని ఇతర ప్రాంతాల నుంచి వచ్చే వాహనదారులకు సమాచారం అందేవిధంగా గూగుల్‌ మ్యాప్‌లో అప్‌డేట్‌ చేయనున్నారు. ఇందుకోసం ట్రాఫిక్‌ విధులు నిర్వహిస్తున్న కానిస్టేబుళ్లు, ఎస్సైలు, ఇన్‌స్పెక్టర్ల చరవాణుల్లో ఈ యాప్‌ను ఏర్పాటు చేశారు. ఈ యాప్‌ ద్వారా ట్రాఫిక్‌ సమస్యలు పరిష్కారమవడంతోపాటు క్యాబ్‌లు, ప్రైవేటు వాహనాల్లో నగరానికి వచ్చే పర్యాటకులు, వాహనదారులు, డెలివరీబాయ్‌లతో సహా రోజుకు 15 లక్షల నుంచి 20 లక్షల మందికి ప్రయోజనం కలుగుతుందని ట్రాఫిక్‌ పోలీస్‌ అధికారులు అంచనా వేశారు. కొద్దిరోజుల క్రితమే గూగుల్‌తో ఒప్పందం కుదుర్చుకున్నామని, ప్రయోగాత్మకంగా యాప్‌ను పనితీరును పర్యవేక్షిస్తున్నామని పోలీసు వర్గాలు పేర్కొన్నాయి.

న్యూయార్క్‌ తరహాలో...

న్యూయార్క్‌ నగరంలో రాకపోకలు కొనసాగించే వాహనదారులు, ప్రయాణికులు ట్రాఫిక్‌లో చిక్కుకోకుండా అక్కడి ట్రాఫిక్‌ పోలీసులు గూగుల్‌ మ్యాప్‌లో సమస్త ప్రయాణ సమాచారాన్ని ఉంచుతున్నారు. ఎక్కడ వాహనాలు ఆగిపోయినా.. ట్రాఫిక్‌ కూడళ్ల రద్దీ ఏర్పడినా ఆయా ప్రాంతాలకు సంబంధించిన ఫొటోలను మ్యాప్‌లో అప్‌డేట్‌ చేస్తున్నారు. ట్రాఫిక్‌ సమస్య తీవ్రత ఎక్కువగా ఉంటే ఐదు కిలోమీటర్ల పరిధిలోని ప్రాంతాల్లో వాహనాల రాకపోకలపై ప్రభావం పడే అవకాశాలున్నాయని, ప్రత్యామ్నాయ మార్గాల్లో వెళ్లాలంటూ ట్రాఫిక్‌ పోలీసులు ఆయా మార్గాలను వాహనదారులకు సూచిస్తున్నారు. గూగుల్‌ మ్యాప్‌లో వాహనాల రాకపోకలు, ట్రాఫిక్‌ జాంలపై ప్రకటనలను ఉంచేందుకు 24 గంటలు ఐటీ విభాగం అధికారులు విధులు నిర్వహిస్తున్నారు. ‘గెట్‌ కనెక్టెడ్‌ గో’ పేరుతో సామాజిక మాధ్యమాల్లో ప్రచారం నిర్వహిస్తున్నారు.

అనూహ్య ఘటనలు.. యాప్‌లో అప్‌లోడ్‌

నగరంలో ట్రాఫిక్‌ జాంలపై సమాచారాన్ని గూగుల్‌ మ్యాప్‌లో ట్రాఫిక్‌ పోలీసులు ఎప్పటికప్పుడు ఇస్తున్నారు. కూడళ్లు, ముఖ్యప్రాంతాల్లో సీసీ కెమెరాలు తీస్తున్న దృశ్యాల ఆధారంగా ట్రాఫిక్‌ పరిపాలన విభాగం, కమాండ్‌ కంట్రోల్‌ నుంచి సమాచారం నమోదుచేస్తున్నారు. ప్రధాన ప్రాంతాలు, అనుసంధాన రహదారులపై అనుకోకుండా జరిగే ఘటనలు, ర్యాలీలు ట్రాఫిక్‌ పోలీసుల దృష్టికి రావడం లేదు. ఆయా ప్రాంతాల్లో రాకపోకలపై తీవ్ర ప్రభావం పడుతోంది. ఇందుకు పరిష్కారంగా అక్కడ విధుల్లో ఉన్న ట్రాఫిక్‌ పోలీసులు ఫోన్‌యాప్‌లో ఫొటోలు తీసినా, వివరాలు పంపినా ఆ సమాచారం కమాండ్‌ కంట్రోల్‌కు వెళ్లి వెంటనే గూగుల్‌ మ్యాప్‌ చూస్తున్నవారందరికీ తెలుస్తుంది.