విద్యుదాఘాతంతో యువకుడి మృత్యువాత

శామీర్‌పేట, న్యూస్‌టుడే: వ్యవసాయ క్షేత్రానికి కాపలా ఉంటున్న కుటుంబానికి చెందిన ఓ యువకుడు మోటారు తీగలను సరి చేస్తూ మృత్యువాత పడిన సంఘటన  ఆలస్యంగా వెలుగు చేసింది. శామీర్‌పేట పోలీసులు, బాధితుడి కుటుంబ సభ్యుల కథనం ప్రకారం వివరాలిలా ఉన్నాయి. సిద్దిపేట జిల్లా జగదేవ్‌పూర్‌ మండలం ఇటిక్యాల గ్రామానికి చెందిన తుమ్మయాదగిరి కుటుంబం.. ఉపాధి నిమిత్తం మల్కాజ్‌గిరి జిల్లా తూంకుంటకు వలస వచ్చింది. ఓంప్రకాశ్‌గుప్తా వ్యవసాయ క్షేత్రంలో ఆరేళ్ల నుంచి  కాపలాదారుగా పనిచేస్తున్నాడు. యాదగిరి చిన్న కుమారుడు తుమ్మ సంజీవ(24) స్థానికంగా పనులు చేసుకుంటూ వ్యవసాయ క్షేత్రంలో తండ్రితో ఉంటున్నాడు. ఈనెల 16న పశువులకు నీరు లేకపోవటంతో బోరు ఆన్‌ చేసేందుకు వెళ్లగా విద్యుత్‌ షాక్‌కు గురై అక్కడికక్కడే మృత్యువాత పడ్డాడు. శామీర్‌పేట ఎస్సై వీరశేఖర్‌ సంఘటన స్థలానికి చేరుకున్నారు. భూ యజమాని నిర్లక్ష్యం వల్ల ఈ ప్రమాదం జరిగిందని సంజీవ బంధువులు ఆందోళనకు దిగారు.