పెనాల్టీ ఛార్జీలు చెల్లించండి: వినియోగదారుల కమిషన్‌

ఈనాడు డిజిటల్‌, హైదరాబాద్‌: పోస్ట్‌ డేటెడ్‌ చెక్కును గమనించకుండా ఇష్టానుసారం ప్రాసెస్‌ చేయడంతో పాటు చెక్‌ బౌన్స్‌ పెనాల్టీ ఛార్జీలు వసూలు చేయడంపై బీకేగూడకు చెందిన బి.కోటేశ్వర్‌రావు కమిషన్‌లో ఫిర్యాదు చేశారు. స్టేట్‌ బ్యాంక్‌ ఆఫ్‌ ఇండియా బల్కంపేట శాఖలో కరెంట్‌ ఖాతాదారు. నగదు లావాదేవీల్లో భాగంగా పోస్ట్‌డేటెడ్‌ చెక్‌తో పాటు మరో రెండు చెక్కులు  అదే రోజు చెల్లుబాటు అయ్యేలా ప్రతివాద బ్యాంకుకు పంపించారు.  దానిని గమనించని ప్రతివాద ఎస్‌బీఐ బ్యాంకు సిబ్బంది అదే రోజున పోస్ట్‌డేటెడ్‌ చెక్కును ప్రాసెస్‌ చేశారు. దీంతో చెక్కు బౌన్స్‌ అయ్యింది. దీనిపై కమిషన్‌ విచారణ నిర్వహించగా.. కొన్ని సాంకేతిక పొరపాట్ల వల్ల ఈ చెక్కులకు పెనాల్టీ పడిందని బ్యాంకువర్గాలు వివరించాయి. దీనిపై కమిషన్‌ తీర్పునిస్తూ చెల్లిన చెక్కులకు విధించిన పెనాల్టీ రూ.1,157 తిరిగి వినియోగదారుకు చెల్లించాలని ఎస్బీఐకి సూచించింది.