ఆర్థిక ఇబ్బందులకు రైతు బలి

చేర్యాల, న్యూస్‌టుడే: సాగులో వచ్చిన నష్టం, చేసిన అప్పులు తీర్చడమెలాగో తెలియడం లేదని ఆందోళన చెందిన రైతు బలవన్మరణానికి పాల్పడిన ఘటన చేర్యాల మండలం రాంపూర్‌లో చోటు చేసుకుంది. ఎస్‌ఐ భాస్కర్‌రెడ్డి తెలిపిన వివరాలు... మండలంలోని రాంపూర్‌కు చెందిన ఇరుముల్ల బీరయ్య (44) బుధవారం సాయంత్రం ఇంట్లో ఎవరూలేని సమయంలో పురుగు మందు తాగి అపస్మారక స్థితికి చేరాడు. తర్వాత ఇంటికి వచ్చిన కుటుంబ సభ్యులు చూసి స్థానిక ప్రభుత్వ ఆస్పత్రికి తరలించారు. అక్కడి వైద్యుల సూచన మేరకు మెరుగైన వైద్యానికి సిద్దిపేటకు తీసుకెళ్లగా చికిత్స పొందుతూ అర్ధరాత్రి చనిపోయాడు. తనకున్న 1.20 ఎకరం భూమిలో నిరుడు పత్తి సాగు చేయగా నష్టం వచ్చింది. ఇప్పటికే మోయలేని అప్పు ఉండగా ఎలా తీర్చాలా అని బాధపడేవాడని కుటుంబ సభ్యులు తెలిపారు. ఆయనకు భార్య, కూతురు, కుమారుడు ఉండగా భార్య విజయ ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్‌ఐ చెప్పారు.