యూకేలో ఉద్యోగం పేరిట రూ.11.14 లక్షలు స్వాహా

నారాయణగూడ, న్యూస్‌టుడే: యూకేలో ఉద్యోగం పేరిట రూ.11.14 లక్షలు దోచేశారు సైబర్‌ కేటుగాళ్లు. హైదరాబాద్‌ సైబర్‌ ఠాణా ఎస్సై వినయ్‌ వివరాల ప్రకారం.. డబీర్‌పురకు చెందిన సయ్యద్‌ వసీమ్‌ విదేశాల్లో ఉద్యోగాల కోసం ప్రయత్నం చేస్తున్నారు. ఈ క్రమంలో ఓ వ్యక్తి పరిచయమై యూకేలో ఉద్యోగం ఇప్పిస్తానంటూ నమ్మబలికాడు. అది నమ్మి వసీమ్‌ ప్రాసెసింగ్‌ ఫీజు, వీసా ఖర్చుల కోసం రూ.9 లక్షల వరకు చెల్లించారు. ఆర్‌బీఐలో డిపాజిట్‌ చేయడానికి మరో రూ. 2.14 లక్షలు కావాలని కోరాడు. ఇలా మొత్తం రూ.11.14 వరకు ఆ మోసగాడికి సమర్పించేశారు. ఆ తర్వాత తాను మోసపోయినట్లు తెలుసుకొని హైదరాబాద్‌ సైబర్‌ పోలీసులకు ఫిర్యాదు చేశారు.