ఆర్థిక సమస్యతో కౌలు రైతు ఆత్మహత్య

పాపన్నపేట, న్యూస్‌టుడే: ఆర్థిక సమస్యలతో కౌలు రైతు ఆత్మహత్య చేసుకున్న సంఘటన మెదక్‌ జిల్లా పాపన్నపేట మండలం నార్సింగిలో బుధవారం సాయంత్రం చోటుచేసుకుంది. ఎస్‌ఐ విజయ్‌కుమార్‌, స్థానికులు తెలిపిన వివరాలు.. నార్సింగి గ్రామానికి చెందిన బోడ రాజు (36) కూలీ పనులు చేసుకుంటూ కుటుంబాన్ని పోషించుకుంటున్నాడు. గత సంవత్సరం మూడు ఎకరాల భూమి కౌలుకు తీసుకుని పత్తి పంట వేశాడు. అకాల వర్షాలతో పంట దిగుబడి అనుకున్నంతగా రాలేదు. అతడిని ఆర్థిక సమస్యలు చుట్టుముట్టాయి. బుధవారం మధ్యాహ్నం ఇంట్లో నుంచి బయటకు వెళ్లి పోచమ్మ ఆలయ సమీపంలో ఉన్న వేప చెట్టుకు ఉరి వేసుకున్నాడు. అటుగా వెళ్తున్న స్ధానికులు గమనించి కుటుంబీకులకు, పోలీసులకు సమాచారం ఇచ్చారు. అతడికి భార్య, ఇద్దరు పిల్లలు ఉన్నారు. పోలీసులు కేసు నమోదు చేసుకొని దర్యాప్తు చేస్తున్నారు.