మద్యం మత్తులో కారుతో బీభత్సం

కారును పట్టుకున్న స్థానికులు

శంషాబాద్‌, న్యూస్‌టుడే: విలాస వంతమైన కారును మద్యం మత్తులో వేగంగా నడిపి ఓ యువతి రహదారిపై బీభత్సం సృష్టించింది. ముందు వెళుతున్న ఓ వాహనాన్ని ఢీకొనడంతో ముగ్గురు గాయపడ్డారు. వాహనదారులు అప్రమత్తమై కారును ఆపి పోలీసులకు అప్పగించారు. ఈఘటన గురువారం శంషాబాద్‌లో చోటుచేసుకుంది. ఆర్జీఐఏ పోలీసుల కథనం ప్రకారం.. అమీర్‌పేట్‌వాసి అమీర్‌ సోహెల్‌, యువతి(25) బెంజ్‌ కారులో శంషాబాద్‌ విమానాశ్రయం వచ్చారు. తిరుగు ప్రయాణంలో యువతి కారు నడుపుతుండగా శంషాబాద్‌ బస్టాండ్‌వద్దకు రాగానే అదుపు తప్పింది. ఇతర వాహనదారుల అప్రమత్తతతో ముప్పు తప్పింది. కారులో విదేశీ మద్యం సీసాలు ఉన్నాయి. యువతికి శ్వాస విశ్లేషణ పరీక్ష చేయగా 550 బీఏసీ నమోదైంది. పోలీసులు కేసు నమోదుచేశారు.