జోరున వాన.. అన్నదాత ఆవేదన

మంబాపూరు కొనుగోలు కేంద్రంలో తడిసిన ధాన్యాన్ని చూపుతున్న రైతులు

పెద్దేముల్‌, న్యూస్‌టుడే: మండలంలో బుధవారం మధ్యాహ్నం కురిసిన వర్షానికి ఆరబోసిన ధాన్యం తడిసి ముద్దయ్యింది. మన్‌సాన్‌పల్లి, దుగ్గాపూరు, రేగొండి, కొండాపూరు గ్రామాల్లో ఇదే పరిస్థితి నెలకొంది. మంబాపూరు కొనుగోలు కేంద్రంలో వడ్లు తడిసిపోయాయి. పొలాల్లో కోతకు వచ్చిన పంట నేలవాలి నష్టం వాటిల్లింది. కొనుగోలు కేంద్రంలో సరైన సౌకర్యాలు లేక అవస్థలు పడుతున్నామని రైతులు ఆవేదన వ్యక్తం చేశారు. వర్షం కురిసిన ప్రతిసారి అవస్థలు తప్పడం లేదని చెప్పారు. వర్షం మొదలు కాగానే విద్యుత్తు సరఫరా నిలిచిపోయింది. తరుచూ సరఫరాలో అంతరాయం కావడంతో వినియోగదారులు తీవ్ర అసౌకర్యానికి గురవుతున్నారు. వర్షం తగ్గినా గంటల తరబడి విద్యుత్తు రావడం లేదు.
తాండూరుగ్రామీణ: తాండూరు మండలం గ్రామాల్లో వర్షం కురిసింది. ఉల్లి కోతలు పూర్తైన రైతులు వర్షంలో తడిసిపోకుండా ఉండేందుకు తాడిపత్రులు కప్పి ఉంచే ప్రయత్నాలు చేశారు. వర్షాల కారణంగా గోనూరు, నారాయణ్‌పూర్‌, వీర్‌శెట్టిపల్లి, ఎల్మకన్నె, చెంగెష్‌పూర్‌, అంతారం, అంతారంతండాలో వరి కోత పనుల్ని వాయిదా వేశారు.