కూల్చివేతలో జాప్యం.. కూలి తప్పిన ప్రమాదం

పద్మారావునగర్‌, న్యూస్‌టుడే: బోయిగూడలో అగ్నిప్రమాదానికి కారణమైన తుక్కుగోదాం ప్రహరీ గురువారం కూలిపోయింది. ఆ సమయంలో ద్విచక్ర వాహనంపై వెళ్తున్న ఓ వ్యక్తికి త్రుటిలో ప్రమాదం తప్పింది. అది గమనించగానే స్థానికులు గాంధీనగర్‌ ఠాణా పోలీసులకు సమాచారం ఇచ్చారు. పోలీసులు అటుగా ఎవరూ వెళ్లకుండా అడ్డుగా తాళ్లు కట్టారు. మార్చి 23న బన్సీలాల్‌పేట డివిజన్‌ బోయిగూడలోని తుక్కుగోదాంలో అగ్నిప్రమాదం జరిగి 12 మంది మృత్యువాత పడిన విషయం తెలిసిందే. అనంతరం గోదాంను నేలమట్టం చేయాల్సి ఉండగా, జీహెచ్‌ఎంసీ యంత్రాంగం ఆ పని చేయలేదు. తాజాగా భవనం తాలుకూ ప్రహారీగోడలు కూలిపోవడంపై స్థానికులు ఆగ్రహం వ్యక్తం చేస్తున్నారు.