ఆ రెండు డెయిరీలు మూసేయండి: పీసీబీ

ఈనాడు, హైదరాబాద్‌: నిబంధనలకు విరుద్ధంగా వ్యవహరిస్తున్న రెండు డెయిరీ ఉత్పత్తుల తయారీ యూనిట్ల మూసివేతకు కాలుష్య నియంత్రణ మండలి(పీసీబీ) ఆదేశాలిచ్చింది. స్థానికుల ఫిర్యాదు, ఇతర సమాచారం ఆధారంగా పటాన్‌చెరు సమీపం పాశమైలారంలోని పవిత్ర డెయిరీ, విశాఖ డెయిరీల్ని తనిఖీ చేసిన అధికారులు వాటిని మూసివేస్తూ ఆదేశాలిచ్చారు. పవిత్ర డెయిరీలో నిషేధిత రసాయనాలు, గుర్తింపు పొందని(అన్‌ బ్రాండెడ్‌) పాల పొడి, ఎక్కువ మోతాదులో సిట్రిక్‌ యాసిడ్‌ వినియోగించి పాలు, పెరుగు, పన్నీరు తయారు చేస్తున్నట్లు వచ్చిన ఫిర్యాదుతో పోలీసులు తనఖీ చేసి గత ఏడాది ఎఫ్‌ఐఆర్‌ నమోదు చేశారు. అనంతరం పీసీబీకి ఫిర్యాదు చేశారు. అలాగే విశాఖ పాల ఉత్పత్తుల సంస్థ వ్యర్థాల్ని స్థానిక పారిశ్రామికవాడ పరిసరాల్లోని డ్రైనేజీలోకి విడుదల చేస్తోందని అధికారులు తనిఖీల్లో గుర్తించారు. నిబంధనల ప్రకారం వర్థాల్ని సీఈపీటీకి తరలించాలి.