నాలాల పొడవునా జాలీలు

ఈనాడు, హైదరాబాద్‌: వర్షాకాలం సమీపిస్తుండటంతో నాలా పూడికతీత పనులను జీహెచ్‌ఎంసీ ముమ్మరం చేసింది. నగర వ్యాప్తంగా ఇప్పటివరకు 63 శాతం పనులు పూర్తయినట్లు కేంద్ర కార్యాలయం తెలిపింది. వర్షాకాలానికి ముందు గరిష్ఠంగా 70 శాతం పూడికను తొలగిస్తామని ఇంజినీరింగ్‌ విభాగం పేర్కొంది. అనంతరం నాలాల పొడవునా జాలీలు నిర్మించే పనులు చేపడతారు. పూడికతీత పనుల కోసం చాలా ప్రాంతాల్లో రక్షణ గోడలు లేదా జాలీలను గుత్తేదారులు తొలగించారు. పనులు ముగియగానే ఆయా ప్రాంతాల్లో రక్షణ చర్యలు చేపట్టాల్సి ఉంది. అలాంటి పరిస్థితులు తలెత్తకుండా జాలీలను, రక్షణ గోడలను పునరుద్ధరించే పనులను జూన్‌లో పూర్తి చేయాలని బల్దియా లక్ష్యంగా పెట్టుకుంది. వర్షాలు మొదలయ్యాక.. నాలాల పొడవునా ఉండే కల్వర్టులు, మోరీల వద్ద పేరుకుపోయిన చెత్త తొలగింపుతోపాటు రహదారులపై గుంతలు పూడ్చటం, నీటి నిల్వలు తొలగించడం తదితర పనులకు సిబ్బందిని అందుబాటులో ఉంచుతామని అధికారులు పేర్కొన్నారు.