ప్రజ్ఞారెడ్డికి రక్షణ కల్పించండి

ఈనాడు, హైదరాబాద్‌: పుల్లారెడ్డి స్వీట్స్‌ యజమాని కుటుంబ వివాదం తాజాగా కోర్టు మెట్లెక్కింది. తనపై గృహహింసకు పాల్పడుతున్నారంటూ పుల్లారెడ్డి స్వీట్స్‌ యజమాని రాఘవరెడ్డి కుటుంబంపై ఆయన కోడలు ప్రజ్ఞారెడ్డి హైదరాబాద్‌ మొబైల్‌ కోర్టును ఆశ్రయించారు. ఆమె పిటిషన్‌పై విచారణ చేపట్టిన న్యాయస్థానం బాధితురాలికి భద్రత కల్పించాలని పంజాగుట్ట పోలీసులకు ఆదేశాలు జారీ చేసింది. తదుపరి విచారణను వచ్చే నెల 9కి వాయిదా వేసింది. తనను హింసిస్తున్నారంటూ ఆమె ఇదివరకే రాఘవరెడ్డి కుటుంబంపై పంజాగుట్ట పోలీసులకు ఫిర్యాదు చేసిన విషయం తెలిసిందే. తర్వాత కూడా తనను ఇంటిలోనే నిర్బంధించారంటూ ఆమె కోర్టును ఆశ్రయించారు. ఇంటిలో తనను హింసకు గురి చేస్తున్నారన్న వైనాన్ని తెలిపే ఫొటోలను కూడా ఆమె కోర్టుకు అందజేశారు. దీంతో రాఘవరెడ్డితో పాటు ఆయన భార్య, కుమారుడికి కోర్టు నోటీసులు జారీ చేసింది.