ఇష్టంలేని పెళ్లిచూపులు..కానిస్టేబుల్‌ ఆత్మహత్య

ఆంజనేయులు

కార్ఖానా, న్యూస్‌టుడే: ఇష్టం లేని పెళ్లి చూపులతో మానసిక ఒత్తిడికి గురైన ఓ కానిస్టేబుల్‌ ఇంట్లో ఉరేసుకుని ఆత్మహత్యకు పాల్పడ్డాడు. కార్ఖానా ఎస్సై నర్సింహులు వివరాల ప్రకారం.. అనంతపురం జిల్లా కదిరికి చెందిన లక్ష్మి కుటుంబం కొన్నేళ్ల క్రితం నగరానికి వచ్చి, కార్ఖానా న్యూ వాసవినగర్‌లో నివసిస్తోంది. ఆమె కుమారుడు దండగల ఆంజనేయులు(25) ఏఆర్‌ కానిస్టేబుల్‌. ఇష్టం లేకపోయినప్పటికీ ఇటీవల పెద్దల సమక్షంలో అతనికి పెళ్లి చూపులు జరిపించారు. దీంతో మానసిక వేదనకు గురవుతున్నాడు. పింఛన్‌ తీసుకునేందుకు తల్లి శుక్రవారం స్వస్థలానికి వెళ్లగా.. ఇంట్లో ఒక్కడే ఉన్నాడు. స్థానికంగా విక్రంపురి కాలనీలో ఉండే అతని సోదరి శనివారం ఫోన్‌ చేయగా.. నైట్‌ డ్యూటీ ఉందని చెప్పాడు. రాత్రి ఫోన్‌ చేయగా ఎంతకూ స్పందించలేదు. దీంతో వరసకు సోదరుడైన క్రాంతిని ఆదివారం ఉదయం పంపింది. ఆంజనేయులు తలుపు తెరవకపోవడంతో.. స్థానికుల సాయంతో బద్దలుకొట్టి, ఇంట్లోకి వెళ్లి చూడగా ఉరేసుకొని కనిపించాడు. పోలీసులు ఘటనా స్థలానికి చేరుకొని మృతదేహాన్ని పోస్టుమార్టం నిమిత్తం ఉస్మానియా ఆసుపత్రికి తరలించారు.