VV Vinayak: మర్యాదలైనా.. రుచులైనా.. గోదారోళ్ల ప్రత్యేకతే వేరు: వినాయక్‌

ఆయ్‌.. పల్లెకు పండగొచ్చిందండి.. అదేనండీ.. సంక్రాంతి.. ఎక్కడెక్కడో ఉన్నోళ్లంతా.. సొంతూళ్లలో వాలిపోతారండీ.. మా గోదారోళ్ల అల్లుళ్లకైతే చెప్పనవసరం లేదండి. ఆల్లకి ముందే ఆహ్వానాలు ఎల్లిపోతాయండి.. ఏమాటకు ఆ మాట చెప్పుకోవాలి గానండీ.. వాళ్లకు మేం చేసే మర్యాదలకు. ఉబ్బితబ్బిబ్బయిపోతారండీ.. పిండివంటలు, మాంసాహార ప్రియులకు ఘుమఘుమలాడే గరమ్‌ మసాలా కూరలు నోరూరిస్తాయి. ఇక తినలేను బాబోయ్‌ అనేదాక వదలమంటే నమ్మండి.. అందుకేనండీ.. మా జిల్లాతో బంధమున్న పలువురు సినీ ప్రముఖులు సంక్రాంతికి అత్తింటి ఆతిథ్యాన్ని ఆస్వాదిస్తుంటారు.

సాయికుమార్‌ తనయుడు సినీ హీరో ఆది రాజమహేంద్రవరానికి చెందిన న్యాయవాది శోభనాద్రి అల్లుడు. ‘‘నా భార్య అరుణతో కలిసి సంక్రాంతి పండగకు వచ్చినపుడు మూడురోజులు చాలా సరదాగా గడిచేవి. గోదావరి తీరమంటే మరీ మరీ ఇష్టం. ఎంత సేపు చూసినా తనివి తీరని అందాలవి. భోగి పండగ రోజున తెల్లవారుజామునే ఇంటి ముందు పెద్ద మంట వేసేవారు. మంట దగ్గర కొంత సమయం ఉంటే బయట చలి పోయి హాయిగా అనిపించేది. పండగ రోజున అత్తయ్య చేసే పిండి వంటలన్నీ బాగుంటాయి. ప్రత్యేకించి ఆమె చేసే ముక్కల పులుసు అంటే ఇష్టం. అక్కడ దొరికే రోజ్‌ మిల్క్‌ అంటే ఎక్కువగా ఇష్టపడతా. సంక్రాంతి అంటనే సినిమాలకు ప్రత్యేకం. అందుకే అక్కడ ఉన్నన్ని రోజులు అందరం కలిసి సినిమాలు చూసేవాళ్లం. ప్రస్తుతం పరిస్థితులు బాగా లేని కారణంగా ఈ ఏడాది అత్తారింట్లో పండగకు హాజరు కాలేకపోతున్నాం’’.

-న్యూస్‌టుడే, మామిడికుదురు, రాజమహేంద్రవరం సాంస్కృతికం, కోరుకొండ