ఆ చెట్లను ఎలా ఎత్తుకెళ్లారో.. అలా తెచ్చిపెట్టారు

సోషల్‌మీడియాలో వైరల్‌ అయిన మ్యూజియం విన్నపం

మ్యూజియంలో ఉన్న చెట్లను దొంగలు ఎత్తుకెళ్లారు. దీంతో ఆ మ్యూజియం సిబ్బంది ఆందోళనకు గురయ్యారు.. దేవుణ్ని ప్రార్థించారు.. సోషల్‌ మీడియా ద్వారా దేశ ప్రజలకు విన్నపం పెట్టారు.. ఆ చెట్లు దొరికితే తిరిగి మ్యూజియంకు అప్పగించమని. అదేంటి చెట్లు పోతేనే అంతలా గాబరా పడాలా, మళ్లీ కొత్త చెట్లు తెచ్చుకొని పెంచుకోవచ్చు కదా అని తీసి పారేయకండి. ఆ చెట్లకు ఉన్న ప్రాముఖ్యత అలాంటిది మరి.. ఈ వార్తలో చెట్లు ఎంత విశేషమో.. ఆ చెట్లు తిరిగి క్షేమంగా మ్యూజియంకు రావడం అంతకు మించిన విశేషం.

వాషింగ్టన్‌లోని పసిఫిక్‌ బోన్సాయ్‌ చెట్ల మ్యూజియంలో గత వారం రెండు చెట్లు మాయమయ్యాయి. అవేం సాధారణ చెట్లు కాదు.. రెండో ప్రపంచ యుద్ధం సమయంలో బందీగా చిక్కిన ఓ జపనీస్‌-అమెరికన్‌ సైనికుడు జైలులో పెంచుకున్న చెట్లవి. వెల కట్టలేని, ఏడు దశాబ్దాల కాలం నాటి ఈ బోన్సాయ్‌ చెట్లను మ్యూజియం సిబ్బంది రోజువారి సంరక్షణతో కాపాడుతూ వస్తున్నారు. ఆ చెట్లకు జాగ్రత్తలు తీసుకోకపోతే ఎక్కువ రోజులు బతకలేవు. అలాంటి చెట్లు చోరీకి గురికావడంతో సిబ్బంది కంగారుపడ్డారు. పోయిన ఆ చెట్లు ఎక్కడైనా కనపడితే తెచ్చివ్వమని సోషల్‌ మీడియా ద్వారా ప్రజలకు విజ్ఞప్తి చేశారు. అదికాస్త దేశవ్యాప్తంగా సంచలనమైంది.

అయితే మూడు రోజుల తర్వాత మ్యూజియంకు సమీపంలో ఆ చెట్లు ప్రత్యక్షమయ్యాయి. చెట్లను ఎత్తుకెళ్లిన దొంగలు భయపడ్డారో.. లేక చెట్ల ప్రాముఖ్యత తెలిసిందో తెలియదు కానీ.. ఎలా ఎత్తుకెళ్లారో అలాగే.. తెచ్చి పెట్టేసి వెళ్లారు. వాటిని గుర్తించిన మ్యూజియం సిబ్బంది సంతోషానికి అవధులు లేవు. ‘‘70ఏళ్ల కాలం నాటి ఈ చెట్లను రోజూ ఎంతో జాగ్రత్తగా సంరక్షిస్తున్నాం. ఇవి పోయి ఉంటే.. తీరని నష్టం జరిగేది’’ అని మ్యూజియం సిబ్బంది చెప్పుకొచ్చారు. దొరికిన రెండు చెట్లలో ఒక చెట్టు స్వల్పంగా దెబ్బతింది. అయినా రెండు చెట్లు క్షేమంగా ఉన్నాయని చెప్పారు.

- ఇంటర్నెట్‌ డెస్క్‌