ఆ చెట్టును చూడాలంటే రిజర్వేషన్‌ ఉండాలి!

(Photo: Visit Xi'an facebook)

ఇంటర్నెట్‌ డెస్క్‌: వర్షాలు తగ్గి.. చలి మొదలయ్యే కాలాన్నే శరదృతువు అని పిలుస్తాం. ఈ కాలంలో కొన్ని రకాల చెట్లకు ఆకులు రాలిపోతుంటాయి. ఆకుపచ్చగా ఉండే చెట్ల ఆకులు.. వివిధ రంగుల్లోకి మారి రాలిపడుతుంటే.. నేలంతా పూలపాన్పులా కనిపిస్తుంటుంది. చైనాలోని గునియిన్‌ గుమియావో ఆలయంలోని ఓ చెట్టు కూడా శరదృతువులో ఆకులు రాల్చుతూ మనోహరంగా కనిపిస్తుంది. అయితే, ఈ చెట్టును చూడాలంటే మాత్రం ప్రజలు రిజర్వేషన్‌ చేయించుకోవాల్సి ఉంటుంది. చెట్టును చూడటం కోసం రిజర్వేషన్‌ చేసుకోవాలా అని ఆశ్చర్యపోతున్నారా? ఆ చెట్టుకు అంత ప్రాముఖ్యత ఉంది మరి..

చైనాటౌన్‌లోని షాంగ్జీ ప్రావిన్స్‌లోని జోంగ్‌నాన్‌ పర్వతాల ప్రాంతంలో ఉందీ గునియిన్‌ గుమియవో అనే బౌద్ధుల ఆలయం. ఆ ప్రావిన్స్‌లోని ప్రముఖ పుణ్యక్షేత్రాల్లో ఇదీ ఒకటి. ఈ ఆలయంలో ఉన్న గింగ్‌కొ బిలోబా అనే చెట్టు పర్యటకులను బాగా ఆకట్టుకుంటోంది. ఈ రకం చెట్లు ప్రపంచవ్యాప్తంగా ఉన్నా ఈ ఆలయంలోని చెట్టు మాత్రం చాలా ప్రాచీనమైనది. ఈ చెట్టు 1400 సంవత్సరాల కిందటిదని, 618-907 మధ్య ఉన్న టాంగ్‌ రాజ్యాన్ని పరిపాలించిన లి షిమిన్‌ దీన్ని నాటినట్టు చరిత్రకారులు చెబుతున్నారు. ప్రపంచంలోనే అత్యంత అందమైన చెట్టుగానూ ఇది గుర్తింపు పొందింది. ఆకుపచ్చగా ఉండే ఈ చెట్టు ఆకులు శరదృతువులో బంగారువర్ణంలోకి మారి రాలిపోతుంటాయి. ఆ ఆకులన్నీ నేలపై పడుతుంటే సుందరదృశ్యం ఆవిష్కృతమవుతుంటుంది. నేలంతా స్వర్ణశోభితంగా.. కనులవిందుగా కనిపిస్తుంది. నిజానికి, శరదృతువు ప్రారంభంలో ఈ చెట్టు వద్ద స్థానికులు మాత్రమే వేడుకలు నిర్వహించేవారు. కొన్నాళ్ల కిందట ఈ చెట్టు అందాలు సోషల్‌మీడియాలో వైరల్‌ కావడంతో దేశవిదేశాల నుంచి పర్యటకుల రాక మొదలైంది.

సాధారణ రోజుల్లో భక్తులు, పర్యటకులు తక్కువగానే ఉన్నా.. అక్టోబర్‌ నెలఖారు నుంచి డిసెంబర్‌ తొలివారం వరకు కనీసం 60వేల మంది పర్యటకులు ఈ చెట్టును సందర్శిస్తున్నారని అక్కడి మీడియా చెబుతోంది. అయితే, పర్యటకులు భారీ సంఖ్యలో వస్తుండటంతో రోజుకు ఏడు నుంచి ఎనిమిది వేల మందిని అనుమతించాలని నిర్ణయించారు. ఈ నేపథ్యంలో పర్యటకులు ఈ చెట్టును సందర్శించడం కోసం ముందుగానే అధికారిక వెబ్‌సైట్‌ ద్వారా ఆన్‌లైన్‌ రిజర్వేషన్‌ చేసుకోవాలని ఆలయ నిర్వాహకులు సూచిస్తున్నారు. రిజర్వేషన్‌ చేసుకొని వచ్చినా.. మూడు నుంచి నాలుగు గంటలు క్యూలో నిలబడితేనే ఆ చెట్టు దర్శన భాగ్యం కలుగుతోందట. ప్రస్తుతం కరోనా కారణంగా విదేశీ పర్యటకులు సంఖ్య తక్కువగానే ఉన్నా.. దేశీయ పర్యటకులు మాత్రం ఈ చెట్టును చూడటానికి ఆసక్తి కనబరుస్తున్నారు.

ఇదీ చదవండి..

నీటిగుంటకు ఇన్‌స్టా ఖాతా.. దానికుందో పెద్ద కథ!