Putin Feces: పుతిన్‌ మల మూత్రాలను సేకరించి.. ప్రత్యేక సూట్‌కేస్‌లో భద్రపరిచి..!

ఇన్వెస్టిగేటివ్‌ జర్నలిస్టుల తాజా నివేదిక

మాస్క్‌: రష్యా అధ్యక్షుడు వ్లాదిమిర్‌ పుతిన్‌ ఆరోగ్యంపై అనుమానాలు వ్యక్తం చేస్తూ ఎంతోకాలంగా కథనాలు వెలువడుతోన్న సంగతి తెలిసిందే. క్యాన్సర్‌ బారినపడ్డారని ఒకసారి, పార్కిన్సన్‌తో బాధపడుతున్నారని మరోసారి.. ఇలా రకరకాల ఊహాగానాలు వస్తూనే ఉన్నాయి. అయితే, ఆయన ఆరోగ్యానికి సంబంధించిన విషయాలు బయటకు చిక్కకుండా క్రెమ్లిన్‌ చాలా జాగ్రత్తలు తీసుకుంటుందనే వాదన ఉంది. ఈ నేపథ్యంలో విదేశాల్లో పర్యటించినప్పుడు పుతిన్‌ మల మూత్రాలను సేకరించి, మాస్కోకు తీసుకెళ్లి పడవేస్తారనే ఆశ్చర్యకరమైన విషయం ఇటీవల వెలుగులోకి వచ్చింది. ఇందుకోసం ప్రత్యేకంగా ఓ బాడీగార్డ్‌ పనిచేస్తారని తాజా నివేదిక వెల్లడించింది.

బయటపెట్టిన జర్నలిస్టులు..

రష్యా అధ్యక్షుడు వ్లాదిమిర్‌ పుతిన్‌ విదేశాల్లో పర్యటించినప్పుడు ఆయన మల మూత్రాలను సేకరించి స్వదేశానికి తీసుకెళతారని తాజా నివేదిక వెల్లడించింది. రష్యా కార్యకలాపాలపై సుదీర్ఘకాలంపాటు వార్తలు సేకరించిన ఇద్దరు ఇన్వెస్టిగేటివ్‌ జర్నలిస్టులు ఈ విషయాన్ని బయటపెట్టారు. రష్యాపై రెండు పుస్తకాలు రాసిన రెజిస్‌ జింటేతో పాటు 13ఏళ్లపాటు రష్యా వార్తలను కవర్‌ చేసిన మిఖైల్‌ రూబిన్‌ రాసిన తాజా వ్యాసం ఫ్రెంచ్‌ న్యూస్‌ మ్యాగజైన్‌ ‘ప్యారిస్‌ మ్యాచ్‌’లో ప్రచురితమైంది. వ్లాదిమిర్‌ పుతిన్‌ ఆరోగ్య రహస్యాలు విదేశీ గూఢచారులకు చిక్కకుండా ఉండేందుకే క్రెమ్లిన్‌ ఇటువంటి జాగ్రత్తలు తీసుకుంటుందని తాజా నివేదిక పేర్కొంది.

ప్రత్యేక ఏజెంట్‌..

ఫ్రెంచ్‌ న్యూస్‌ మ్యాగజైన్‌ నివేదిక ప్రకారం, వ్లాదిమిర్‌ పుతిన్‌ విదేశాల్లో పర్యటించినప్పుడు ఆయన రక్షణ బాధ్యత ఫెడరల్‌ ప్రొటెక్షన్‌ సర్వీస్‌ నిర్వహిస్తుంది. పుతిన్‌తోపాటు ఇతర ప్రభుత్వ అధికారుల సంరక్షణనూ ఈ ఎఫ్‌పీఎస్‌ చూసుకుంటుంది. పుతిన్‌ మల విసర్జనకు వెళ్లిన ప్రతిసారి ఓ ఎఫ్‌ఎస్‌ఓ ఏజెంట్‌ (ఫెడరల్‌ గార్డ్‌ సర్వీస్‌) వాటిని సేకరించి ఓ ప్రత్యేకమైన ప్యాకెట్‌లో భద్రపరుస్తారు. అనంతరం వాటిని ఓ సూట్‌కేసులో ఉంచి రష్యాకు తీసుకెళ్తారు. 2019 మే నెలలో ఫ్రాన్స్‌ పర్యటన, 2019 అక్టోబర్‌లో సౌదీ అరేబియాలో పర్యటించిన సందర్భాల్లో పుతిన్‌ విసర్జనాలను సేకరించినట్లు సమాచారం. 2019లో ఫ్రాన్స్‌లో పర్యటన సమయంలో పుతిన్‌ బాత్‌రూమ్‌కు వెళ్లినప్పుడు ఆయన వెంట ఆరుగురు బాడీగార్డులు తోడుగా ఉన్నారు. అందులో ఒక వ్యక్తి చిన్న సూట్‌కేసును తీసుకొని బాత్‌రూమ్‌ నుంచి బయటకు వచ్చినట్లు ఉన్న ఓ వీడియోను ఒక జర్నలిస్టు సోషల్‌ మీడియాలో పోస్టు చేశారు.

గతంలోనూ ప్రయత్నాలు..

మరోవైపు కీలక వ్యక్తుల మలమూత్రాలతో వారి ఆరోగ్య రహస్యాలపై గూఢచర్యానికి పాల్పడే ప్రయత్నాలు ఎంతో కాలంగా సాగుతున్నాయనే వార్తలు వస్తూనే ఉన్నాయి. ఈ క్రమంలో పుతిన్‌ మలమూత్రాలను సేకరించే అంశం ఎప్పటినుంచో కొనసాగుతోందని పలువురు జర్నలిస్టులు గుర్తుచేస్తున్నారు. వియన్నా పర్యటన సందర్భంగా ఇటువంటి ఘటన చోటుచేసుకున్న విషయాన్ని ఫరీదా రుస్తమోవా అనే జర్నలిస్టు గుర్తుచేశారు. చైనా నేత మావోతోపాటు ఇతర ఉన్నతాధికారుల గురించి తెలుసుకునేందుకు వారి మలాన్ని విశ్లేషించి సోవియట్‌ యూనియన్‌ అధినేత జోసెఫ్‌ స్టాలిన్‌ గూఢచర్యానికి ప్రయత్నించినట్లు మాజీ సోవియట్‌ ఏజెంట్‌ ఒకరు 2016లో వెల్లడించారు. కోల్డ్‌వార్‌ సమయంలో తూర్పు జర్మనీలో సోవియట్‌ బలగాలు ఉపయోగించిన టాయిలెట్‌ పేపర్లను బ్రిటిష్‌ నిఘా సంస్థలు జల్లెడ పట్టాయనే వాదన ఉంది. ఈ విషయాన్ని వెల్లడించిన బ్రిటిష్‌ సైనిక నిపుణులు టోని గెరాగ్టీ.. అందుకే సోవియట్‌ సైన్యానికి టాయిలెట్‌ పేపర్లను ఇవ్వరని పేర్కొన్నాడు.

డీఎన్‌ఏ, మలవిసర్జనాల భయం..

గూఢచర్యానికి సంబంధించి మలమూత్ర విసర్జన, డీఎన్‌ఏ వంటి కీలక విషయాల్లో కొందరు దేశాధినేతలు అత్యంత జాగ్రత్తగా వ్యవహరిస్తున్నట్లు పలు సంఘటనలు స్పష్టం చేస్తున్నాయి. ఇటీవల రష్యా పర్యటన సందర్భంగా ఫ్రాన్స్‌ అధ్యక్షుడు ఇమ్మాన్యుయేల్‌ మేక్రాన్‌ను డీఎన్‌ఏ తస్కరణ భయం వెంటాడిన విషయం తెలిసిందే. అందుకే కొవిడ్‌ టెస్టు చేస్తామన్న రష్యా అధికారుల అభ్యర్థనను తిరస్కరించిన ఆయన.. ఒకవేళ కొవిడ్‌ పరీక్షకు నమూనా ఇస్తే రష్యా వైద్యులు డీఎన్‌ఏను తస్కరిస్తారనే భయంతోనే అందుకు నిరాకరించినట్లు సమాచారం. అంతేకాకుండా రష్యా అధ్యక్షుడు పుతిన్‌తో భేటీ సమయంలోనూ 20 అడుగుల దూరంలో కూర్చొని ఆయన చర్చలు జరిపారు. అంతేకాకుండా కనీసం మర్యాదపూర్వకంగా ఇరువురు నేతలు చేతులు కూడా కలపకపోవడం గమనార్హం.