వందేళ్ల వయసులో..ఓటుకోసం మంచంపై...

ఇంటర్నెట్‌ డెస్క్‌ : తమను పరిపాలించే నాయకులెవరో నిర్ణయించుకునే అధికారం ప్రజలకు ఉందంటే అందుకు ఓటు హక్కే కారణం. అలాంటి ఓటు హక్కును వినియోగించుకోవటం పౌరులందరి బాధ్యత. అయితే కొంతమంది వేర్వేరు కారణాల వల్ల ఓటు వేయటానికి దూరంగా ఉంటారు. మరికొందరు మనకెందుకులే అని నిర్లక్ష్యంగా వ్యవహరిస్తారు. తామొక్కరు ఓటు వేయకపోతే ఏమవుతుందిలే అనుకుంటారు. కానీ..ఆ వృద్ధుడు అలా అనుకోలేదు. వయసు వందేళ్లున్నా, శరీరం సహకరించక మంచానికే పరిమితమైనా, చేతికి సెలైన్‌ బాటిల్‌ పెట్టుకుని ఉన్నా ఓటు వేయటం మాత్రం మానుకోలేదు. తన హక్కును వినియోగించుకోవటంలో వెనక్కి తగ్గలేదు. అతడే బిహార్‌లోని ఖాతిహర్‌ జిల్లాకు చెందిన సుఖ్‌దేవ్‌. అనారోగ్యంతో బాధపడుతున్న ఆయనకు ఓటు వేయటంలో ఇతరులు సహకరించారు. మంచంతో సహా పోలింగ్‌ బూత్‌ వద్దకు తీసుకువచ్చారు. ఈ ఘటనకు సంబంధించిన వీడియో సామాజిక మాధ్యమాల్లో వైరల్‌గా మారింది. బాధ్యతను విస్మరించని సుఖ్‌దేవ్‌పై నెటిజన్లు ప్రశంసల జల్లును కురిపిస్తున్నారు.