100 years old woman:  బామ్మ మాట.. ‘వందేళ్ల’ బాట

చిన్నప్పుడు రెండో ప్రపంచ యుద్ధం, యవ్వనంలో స్వాతంత్య్ర సమరం.. ఇక వృద్ధాప్యంలో ప్రపంచాన్ని వణికిస్తోన్న కరోనా మహమ్మారి.. అన్నీ కళ్లారా చూశారు ఆ వందేళ్ల బామ్మ. జీవితానికి నిర్వచనం.. 100ఏళ్లు ఆరోగ్యంగా, ఆహ్లాదంగా ఉండటానికి ఆవిడ చెప్పే సూత్రాలు తెలిసినవే అయినా..ఆ బామ్మ ఉత్సాహంగా చెబుతుంటే నెటిజన్లు ఫిదా అవుతున్నారు. ఆ బామ్మ ఇచ్చే సందేశాలను వీడియో రూపంలో ‘హ్యూమన్స్‌ ఆఫ్‌ బాంబే’ అనే పేజీ ఇన్‌స్టాగ్రామ్‌ వేదికగా పంచుకుంది.

‘‘హాయ్‌..! నాపేరు కమల.. నా వయసు 100 ఏళ్లు. నేను రెండో ప్రపంచ యుద్ధం కళ్లారా చూశా. స్వాతంత్ర్య సమరంలో పోరాడాను, ఆ తరువాత స్వాతంత్ర్య సంబరాల్లోనూ పాల్గొన్నా. ఇప్పుడు ప్రపంచాన్ని వణికించే కరోనా మహమ్మారిని ఎదుర్కొంటున్నాను.. ఇవన్నీ చూసి వచ్చిన నేను..మీరు వందేళ్లు ఆనందంగా ఎలా గడపాలో ఆ సీక్రెట్‌ చెబుతా వినండి’’
* ఎప్పుడైనా సరే ఓపెన్‌ మైండ్‌తో ఉండాలి. ఏ పరిస్థితి ఎదురైనా వెనకడుగు వేయకుండా అంగీకరించాలి.

*  జీవితంలో మార్పులు జరుగుతుంటే భయపడకండి. వాటిని సమర్థవంతంగా ఎదుర్కోండి. కాలానికి తగ్గట్టు మారడం అలవరుచుకోండి.

* అప్పుడప్పుడు పిజ్జా తినండి. అందులో ఉండే కొన్ని కేలరీలు శరీరానికి మంచివి కూడా.

* రోజుకి 30 నిమిషాలు నడవండి.. అలాగే ధ్యానం చేయండి. ఈ విషయాల్లో నిర్లక్ష్యం చేయొద్దు.

* చుట్టూ ఉన్న జనాలు ఏవేవో అంటుంటారు. వాళ్లేమనకుంటారు.. వీళ్లేమనుకుంటారో అని.. వాటిని  లెక్కచేయకండి.

* జీవితాన్ని మరీ సిరీయస్‌గా తీసుకోకండి. కచ్చితంగా వందేళ్లు బతుకుతారు.

కాగా ఈవీడియోని 75లక్షల మంది వీక్షించగా.. 3లక్షల పైగా లైకులతో ముందుకు దూసుకెళ్తోంది.