నెటిజన్లను మెప్పిస్తోన్న చిన్నారి

ఇంటర్నెట్‌డెస్క్‌: ఆరోగ్యం గురించి జాగ్రత్తలు తీసుకోవడానికి వయసుతో సంబంధంలేదని నిరూపించింది నాగాలాండ్‌కు చెందిన మూడేళ్ల లిపావి. తనకు జలుబు చేయడంతో ఎవరి సాయం లేకుండా ఆరోగ్య కేంద్రానికి వెళ్లి చెకప్‌ చేయించుకుంది. జున్హెబోటో జిల్లాలోని ఘతషి తాలూకాలో హెబోలిమి ఆరోగ్య కేంద్రంలో ఈ సంఘటన జరిగింది. లిపావి అమ్మానాన్నలు పొలం పనులకు వెళ్లడంతో తన ఇంటికి కొద్దిదూరంలోనే ఉన్న ఆరోగ్య కేంద్రానికి తానే స్వయంగా చెకప్‌ చేయించుకోవడానికి వెళ్లింది. లిపావిని చూసి అక్కడి ఆరోగ్య సిబ్బంది ఆశ్చర్యపోయారు. విషయం తెలుసుకున్న వైద్యులు చిన్నారిని పరీక్షించి జాగ్రత్తగా ఇంటికి పంపించారు. వైద్యురాలు చిన్నారి లిపావిని చెకప్‌ చేస్తున్న ఫొటోను సామాజిక మాధ్యమాల్లో పంచుకోగా అది కాస్తా వైరల్‌గా మారింది. స్వయంగా ఆరోగ్య కేంద్రానికి వెళ్లిన చిన్నారి బాధ్యతగా వ్యవహరించిందని, పెద్దవాళ్లకు కూడా ఆదర్శంగా నిలిచిందని నెటిజన్లు ప్రశంసిస్తున్నారు.