అంతర్వేది అగ్నిప్రమాదంపై స్పందించిన డీజీపీ

అమరావతి: తూర్పుగోదావరి జిల్లా అంతర్వేది లక్ష్మీనరసింహస్వామి ఆలయానికి చెందిన రథం దగ్ధమైన ఘటనపై డీజీపీ గౌతమ్‌ సవాంగ్‌ స్పందించారు. సంఘటన జరిగిన వెంటనే పోలీసులు స్పందించారని చెప్పారు. అగ్నిమాపక శాఖ డైరెక్టర్‌ ఆధ్వర్యంలోని ఓ బృందం ఘటనాస్థలానికి చేరుకుని తక్షణమే ఆ మంటలను అదుపులోకి తీసుకొచ్చిందన్నారు. ఈ మేరకు డీజీపీ ఓ ప్రకటన విడుదల చేశారు. జిల్లా ఎస్పీ, ఏలూరు డీఐజీ సంఘటనా స్థలానికి చేరుకుని పరిశీలించారన్నారు. విజయవాడ నుంచి ఫొరెన్సిక్‌ డైరెక్టర్‌ నేతృత్వంలో నిపుణుల బృందం ఘటనాస్థలానికి బయల్దేరిందని చెప్పారు. ఈ ఘటనకు సంబంధించి ఇప్పటికే పూర్తిస్థాయి సాక్ష్యాధారాలను సేకరించే పనిలో అధికారులు నిమగ్నమయ్యారని డీజీపీ పేర్కొన్నారు.